DILI (TATOLI) – Governu liuhosi reuniaun Konsellu Ministru, Tersa (28/03/2017), aprova formatu foun konaba memorandum intedementu (MoU-Memorandum of Understanding) hosi Komisaun Nasionál Kombate HIV-SIDA Timor-Leste ho Komisaun Nasionál Indonesia.
Sekretariu Ezekutivu Komisaun Kombate HIV-SIDA, Daniel Marsal hateten, antes ne’e, formatu MoU tuan sira hato’o ba konsellu ministru, maibe hadia hikas tamba persiza formatu hosi Ministeriu Negosiu Estrangeirus no Koperasaun (MNEK).
“Formatu refere los ona, tanba uluk ami halo formatu ne’e bazea deit ba formatu internal ami nian, depois aprezenta fulan hirak liu ba iha KM, KM husu para tenki uja formatu Ministeriu Estranjeiru nia ne’ebe mak timor laran tomak uja,” Daniel Marcal ba jornalista, iha Palacio do Governo.
Komisaun Nasionál Kombate HIV-SIDA Timor-Leste no Indonesia antes ne’e uja formatu interna husi Komisaun nian hodi halo sosializasaun informasaun no prevensaun Moras ne’e iha fronteira entre nasaun rua. Maibe ho formatu foun ne’ebe Konsellu Ministru aprova ona, nia parte sei kontatu hikas parte Indonesia nian hodi hare’e fali koperasaun ne’e.
Daniel esklarese, durante ne’e komisaun nasional parte rua implementa ona akordu iha parte Fronteira Parte Timor-Leste nian maka Oecuse, Motain, Tunubibi, Salele no Atauro, enkuantu parte Indonesia hanesan Wini no Kefa.
Jornalista: Agapito dos Santos / Editor: Gantry Meilana
