Dili, (Tatoli) – Sekretrariadu Tékniku Administrasaun Eleitorál (STAE) loke hikas tan resenseamentu no atualizasaun baze dadus iha munisípiu hotu.
Informa Diretór Jerál STAE, Acilino Manuel Branco ba Agência Noticosa Tatoli iha nia servisu fatin, Caicoi, hafoin tribunál rekursu proklama rezultadu verifikasaun nasionál ba kandidatu prezidente repúblika.
“Tribunál rekursu anunsia rezultadu no halo kompletamente eleisaun prezidensiál, eleisaun lejislativa, STAE loke tan resensiamentu no atualizasaun baze dadus iha STAE munisípiu ida-idak inklui Rejiaun Autonomu Enklave Oe-Cusse no Ambeno (RAEOA) iha semana oin” Diretór Jerál STAE hateten.
Tuir Diretór Jerál STAE, lei resenseamentu eleitorál fo dalan atu hahú aktu preparasaun ba prosesu atualizasaun baze dadus hafoin eleisaun parlamentár.
Acilino husu ba komunidade sira ne’ebé idade atinje ona 17 no sira ne’ebé durante ne’e ladauk rejistu bele hakat ba edifísiu STAE atu rejistu, nune’e, bele hetan oportunidade partisipa iha eleisaun lejislativa. Orgaun eleitorál dadaun ne’e re-organiza fali rekursu ho kondisaun hotu atu hasoru festa demokrásia. (Jornalista : Zezito Silva/Editor: Alberto Alves)
