Dili (TATOLI) – Implementasaun programa hosi sosiedade sivíl, durante ne’e hatudu pontu pozitivu barak, liliu iha área remota ne’ebé governu la konsege tama. Maibe, hosi observasaun xefi governu nian, sosiedade sivíl sira durante ne’e depende osan hosi doadór sira, inklui hosi osan governu.
“Hasoru malu ho sosiedade sivíl atu hanoin lisuk kona-ba vantazen no dezvantaze sosiedade sivíl iha prosesu dezenvolvimentu nasionál atu bele mellora di’ak liu tan iha futuru,” PM Rui hato’o ba Ajénsia Notísia TATOLI, hafoin hasoru malu ho sosiedade sivíl kona-ba dezvantanjen ne’ebé Organização Não Governamental hasoru dependénsia finansiamentu hosi parseiru dezenvolvimentu no governu.
“Sosiedade sivíl nu’udar parseiria ho governu tanba ne’e, to’o tempu ona atu haree fila fali implementasaun programa sira ne’e hodi reforsa di’ak liu tan ba dezenvolvimentu komunidade tomak,” PM Rui akresenta.
Entretantu, Diretór Ezekutivu FONGTIL, Arsenio Pereira rekoñese frakeza no preokupasaun sira ne’ebé relasiona ho fundus ne’ebé depende de’it ba doadór sira.
“Sosiedade sivíl sira laiha kreatividade atu buka alternativu, maibé liuhosi meiu ne’e bele partilla ba malu no futuru buka dalan hodi hadia di’ak liu tan,” dehan Arsenio.
Jornalista: Zezito Silva
Editor: Gantry Meilana
