DILI, (TATOLI) – Ministru Turizmu, Arte no Kultura (MTAK) dehan presiza kontribuisaun setór barak hodi dezenvolve turizmu ne’ebé di’ak atu sustenta Timor-Leste.
“Turizmu labele husi MTAK de’it maibé ita hotu nia responsabilidade, setór privadu, sosiedade sívil, governu no peritu sira hosi nasionál no internasionál tenke kontribui para ita bele dezenvolve turizmu ne’ebé di’ak atu bele sustentável ba nasaun ne’e, liuliu benifísiu Estadu no hadi’a povu nia moris”, tenik iha ámbitu lansamentu livru Emerging Tourism Destination: Chalenges and Opportunities iha paviliaun Sentru Kovensaun Dili foin lalais ne’e.
Bainhira dezenvolve turizmu ho di’ak, tuir nia, bele sustenta ba jerasaun tuir mai no ekonomia Nasaun.
“Turizmu nunka hotu no nunka mate, mina ita bele iha, maibé ita nunka hatene bele dura to’o bainhira”, afirma.
Biban ida ne’e, governante ne’e husu kontribuisaun no hanoin ba MTAK hodi hamutuk ho setór sira hotu, atu bele fortifika tan hanoin no tau hamutuk.
Hodi dehan tan, MTAK sempre apóiu ba faze oin atu livru ne’e bele públika iha internasionál no nia sente onra no orgulhu tanba durante ne’e bele servisu hamutuk parseiru sira hodi to’o lansamentu livru ne’e.
Iha fatin hanesan, diretór estudu post graduasaun DIT, João Cancio Freitas hatutan, to’o oras ne’e hetan pedidu husi universidade internasionais atu bele hetan asesu ba kontiúdu livru ne’e.
Ne’e duni Diretór dehan sei buka hela fundus atu kompila fali artigu sira ne’ebé iha livru ne’e, ne’ebé selesiona entre 15 to’o 20 hodi buka dalan atu públika iha nível internasionál.
“Ami halo hela negosiasaun ho emerald printing group iha área turizmu no área sosiál. Internasionalmente koñesidu, sira mós hakarak públika iha livru ida ho kontekstu dimensaun internasionál”, informa.
Bainhira hetan ona fundus, sei kontaktu fali autór sira hodi revee sira nia komunikadu hodi kompri rekezitu sira ne’ebé emerald printing group hatur, tinan ne’e remata e bele públika livru ne’e iha nível internasionál.
João Cancio informa, hafoin lansamentu ne’e, DIT sei loke jornál akadémiku nune’e bainhira loke programa post graduasaun la-kleur tan, bele iha fatin atu públika library catalog rescue, nune’e prosedimentu konferénsia hotu-hotu ne’ebé DIT halo bele públika hodi no tulun komunidade akadémika iha Timo-Leste nomós internasionál atu hetan asesu.
Jornalista: Julia Chatarina
Editora: Rita Almeida
