DILI, (TATOLI)- Governu Timor-Leste (TL) ne’ebe reprezenta hosi Autoridade Nasionál Pertóleo no Minerál (ANPM) no Timor Gap asina akordu Contrato de Partilha de Producão (CPP) onshore hodi halo produsaun mina no gas iha bloku rua iha rai maran.
Kontrantu CPP ne’e TL asina ho ho empreza Timor Resources husi Austrália, iha otél Novo Turismo, Segunda (10/04/2017).
“Ema barak lafiar, ema barak kestiona mas ida ne’e prova ida tan. Atu reiteira de’it importánsia husi dezenvolvimentu iha setór petróleo no gás iha tutela ministru Alfredo Pires ninian durante besik tinan 10 ikus ne’e bele reflete mós, oinsá prosesu konstrusaun estadu iha prosesu konstrusaun ba nasaun Timor-Leste nian”, katak PM.
Rui Maria de Araújo hatutan hotu-hotu tenke orgullu hanesan Timoroan tanba ho profesionalizmu, defende interese nasionál no foku atu lori buat ne’ebé di’ak mai Timor-Leste. “Tanba ida ne’e, ha’u hakarak hato’o parabéns importante ba ministru no nia ekipa tomak”.
Hodi Governu nia naran, PM agradese mós empreza Timor Resources tanba sira-nia konfiansa atu mai investe iha Timor-Leste tanba iha situasaun agora la’ós fasil nune’e mós iha setór petróleo no gás la’ós fasil liután.
Ministru Petróleo no Rekursu Minerál (MPRM), Alfredo Pires hatutan, Timor-Leste dahuluk iha istória asina kontratu bloku rua iha rai-maran (onshore) no kompañia nasionál halo prezensa porsentu 50 ba esplorasaun ba rekursu naturál nian.
“Kontratu ida PCC (Contrato de Partilha de Producão) ne’e, kontratu ida mahar, difisíl iha aspetu oioin de’it, legais, komersiais no negosiasaun ne’e halo ho timoroan porsentu 100,” nia katak.
Nu’udar ministru, nia kontente no orgullu ba prosesu tomak ne’ebé ANPM no Timor Gap halo ba nasaun ida ne’e.
Jornalista: Maria Auxiliadora / Editor: Gantry Meilana
