DILI, (TATOLI) – Sekretáriu Estadu Komunikasaun Sosiál, Nelio Isaac hatete, jornalista sira labele goza de’it liberdade imprensa ne’e, maibé importante mak utiliza atu fó informasaun kualidade nomós ho responsabilidade.
“Selebrasaun loron liberdade imprensa ne’e fó mai ita oinsá mak ita atu livre hetan no fó informasaun ho kualidade no responsabilidade”, katak ba jornalista sira iha Palásiu Governu, tersa (25/4) relasiona ho loron liberdade imprensa ne’ebé sei akontese iha loron 3 fulan-maiu.
Importante hosi selebrasaun tinan ne’e, tuir nia, tempu ona mídia sira atu hadi’a produtu jornalístiku, ida ne’e de’it mak prestíziu nu’udar jornalista no mídia sei hetan fatin iha públiku.
Iha tinan 1993, Asembléia Jerál Nasoens Unida deside 3 maiu sai loron ba imprensa atu preserva liberdade komunikasaun sosiál husi ataka independénsia nom’os presta omenajen ba jornalista sira ne’ebé mate ona durante hala’o sira nia profisaun. Komunidade imprensa iha mundu sei promove prinsípiu fundamental liberdade imprensa.
Loron ne’e atu dudu inisiativu públiku tuir luta ba liberdade imprensa.
Jornalista: Julia Chatarina
Editora: Rita Almeida
