DILI, (TATOLI) – Programa Monotorizasaun ba Sistema Judisiáriu (JSMP – Judicial System Monitoring Programme) ohin sesta (28/4) lansa relatóriu anuál importante rua hanesan Overview of the Justice Sector (OJS) 2016 no Parliamentary Watch Project (PWP), iha tempu hanesan mós komemora tinan 16 JSMP nian.
Tuir komunikadu ne’ebé TATOLI asesu, relatóriu rua ne’e sei iha análize konaba progresu alkansadu no dezafíus ne’ebé infrenta iha setór justisa, inklui presesu kazu liuhosi tribunál sira, prosesu lejislativu iha Palamentu Nasionál (PN), nomós eventu importante ne’ebé JSMP observa no nota iha 2016.
“Tuir tradisaun institusionál JSMP, tinan ne’e sei aprezenta panorama regulár husi importante dezafíu no dezenvolvimentu iha setór justisa no kestaun lejislativa ne’ebé iha interese públik jerál iha Timor-Leste ho meiu ida atu kontribui ba dezenvolvimentu husi setór rua ne’e”, katak Diretór Ezekutivu JSMP, Luis de Oliveira Sampaio iha nota imprensa.
Panorama setór justisa 2016 nian, fó análize no informasaun ne’ebé JSMP hili desde nia mandatu servisu hanesan monotorizaun ne’ebé realiza iha 2016. Relatóriu ne’e diskute progresu alkansadu no dezafíu ne’ebé hetan iha setór justisa, inklui estatístika konaba kazu ne’ebé Tribunál Distritál sira rona, hanesan violénsia doméstika, estupru, krime kometidu durante ezersisiu funsaun públiku nian no krime komun seluk.
Entretantu, relatóriu PWP fó informasaun ne’ebé JSMP hili desde kontrolu PN durante tinan 2016 konaba dezenvolvimentu polítiku no lejislativu, produtividade parlamentár, progresu alkansadu no dezafíus ne’ebé parlamentu hetan iha elaborasaun lei no pontualidade deputadu sira nian iha plenária no komisaun A.
Relatóriu seluk, hanesan relatóriu instutisionál JSMP ne’ebé esplika atividade JSMP iha tinan 2016 atu fó justifikasaun no forma ida husi prestasaun kontas ba públik.
Jornalista: Julia Chatarina
Editora: Rita Almeida
