DILI, (TATOLI) – Estudante Departamentu Komunikasaun Sosiál (DKS), Universidade Nasionál Timor Lorosa’e (UNTL) komemora loron liberdade imprensa ne’ebé monu iha loron 3 fulan-maiu ho marsa naruk husik Kampus Kaikoli to’o Bekora hodi fó omenajen ba jornalista Sander Robert Thoenes no jornalista sira ne’ebé mate tanba hala’o kna’ar jornalizmu nian.
Sander Robert Thoenes, ema Olanda nian ne’ebé mate iha loron 21 setembru 1999, militár Indonézia husi batallaun 745 oho iha área igreja Bekora nia oin hafoin Organizasaun Nasaun Unida anúnsiu rezultadu referendu iha momentu ne’ebá.
Loron ba liderdade imprensa ne’ebé fó sai iha tinan 1993, ONU liuhusi UNESCO (United Nation for Education, Science and Culture) deklara loron 3 fulan-maiu nu’udar loron ida ne’ebé atu komemora prinsípiu báziku liberdade imprensa, atu sukat liberdade imprensa iha mundu.
Husi ne’ebá, komemorasaun loron ida ne’e atu defende liberdade mídia sira husi atake ba independénsia no fó omenajen ba jornalista sira ne’ebé mate bainhira hala’o nia kna’ar.
Sai hanesan kultura husi departamentu nian dezde harii iha 2008, marsa naruk husi estudante sira iha loron ida ne’e hodi kari ai-funan ba jornalista Sander nia rate.
Diretóra Departametu Komunikasaun Sosiál, Constancia S.C.B de Jesus ba TATOLI informa, ohin, estudante sira ne’e halo long mars ba matebian Sander nia rate nu’udar lisaun ida katak aprende iha Komunisaun Sosiál no futuru sai jornalista ida, sei lafasil tanba ida ne’e kna’ar ida todan tebes.
“Husi ne’e sira aprende la’ós de’it fó informasaun maibé lori mós sira-nia isin hodi troka informasaun hanesan ita-nia jornalista estranjeiru ne’ebé mate iha ita rain tanba de’it atu fó sai situasaun reál ne’ebé momentu ne’e akontese iha 99 no inimigu sira tenke oho nia tanba de’it atu fó informasaun di’ak ba públiku. Lisaun ba estudante sira mak aleinde siénsia ne’ebé hetan brani mós fó informasaun”, dosente ne’e dehan.
Ba estudante sira dosente ne’e husu atu badinas estuda no domina área ne’ebé sira foti no iha atitude, skill, brani atu iha futuru sai jornalista ne’ebé di’ak.
Prezidente komisaun organizadora, Bernardo Sarmento iha Bekora hafoin kari ai-fuan hatete loron ida ohin importante tebes ba jornaslista sira iha Timor-Leste no mundu tomak.
“Ba Komunikasaun Sosiál importante komemora loron ida ne’e tanba haree dezafiu ne’ebé durante ne’e jornalista sira hasoru to’o balun mate. Ida ne’e esperiénsia ida ba ita oinsá sira-nia luta defende lia-loos no hakarak fahe ba ema hotu atubele hatene”.
Jornalista: Maria Auxiliadora
Editora: Rita Almeida
