DILI, (TATOLI) – Diretora Fundasaun Patria, Laura Pina hateten kampaña “Pursentu 100 hau prontu” mosu bainhira movimentu feto potensiál koko hanoin buat ruma atu tau iha pratika no halo mudansa.
“Ami feto maluk tur hamutuk, movimentu feto Timor-Leste koko hanoin buat ruma atu bele tau iha prátika no bele halo mudansa, mosu hanoin revolusionária ida katak ita buka tok feto 100 hodi mobiliza, enkoraja, fó kapasitasaun atu kandidata-án ba xefe suku no xefe aldeia iha eleisaun”, katak iha ambitu Konferénsia Nasionál Partisipasaun Feto No Labarik Feto iha Otél Novo Turizmu, kuarta (10/5).
Hodi hatutan, passadu partisipasaun feto hanesan xefe suku pursentu rua de’it, entaun hetan rekomendasaun husi steearing komité no Estadu atu hadi’a persentajen ne’e.
Nune’e, nia akresenta, Fundasaun Pátria hamutuk harii steering komité ida ne’ebé kompostu husi Rede Feto, Caucus, APCTL, Fokupers, Alola Fundation, FKSH nomós ONG internasionál sira hanesan Plan, CARE, Counterpart no hetan apóiu másimu husi sestu governu konstitusionál hanesan Sekretariu Estadu asuntu Feto nomos Ministériu Administrasaun Estatal.
“Inisiativa refere mosu husi Fundasaun Pátria, maibé ida ne’e sai hanesan movimentu feto nia idéia no inisiativa”.
Nune’e nia informa, kampaña 100 pursentu hau prontu mosu, bele fetonain 100 kandidata ba xefe suku.
“Fofoun inisiativa ne’e mosu, ema barak la fiar no sira dehan ita sei la hetan feto, maibé ho komisaun 100 pursentu hau prontu, esforsu dahuluk ami halo hodi hakbesik ba MAE no Parlamentu Nasionál (PN) atu asegura integrasaun sistema kuota iha suku”.
Haktuir, felizmentu hetan duni katak pursentu 50 sistema kuota ne’ebé Estadu fó hanesan ba Feto no Mane no ida ne’e komprova duni katak Estadu kumpri ninian obrigasaun ba konvensaun sira.
Hodi ne’e, rezultadu feto potensiál nain 21 sai xefe suku, muda pursentu rua ba pursentu lima no xefe aldéia uluk feto nain 25, agora 85.
“Kampaña ne’e sai buras liutan, fofoin atu hetan de’it feto nain 100 maibé felizmente ita hetan 300 resin kandidatu feto ne’ebé kandidata ba xefe suku no kuaze 400 resin mak kandidata ba xefe aldéia.
Maske 21 de’it mak sai hanesan xefe suku, maibé kontente tanba iha mudansa signifikante.
Jornalista: Julia Chatarina
Editora: Rita Almeida
