DILI, (TATOLI) – Akadémiku husi Universidade Nasionál Timor Lorosa’e (UNTL), Victor Soares hateten slogan rezisténsia timoroan sira nian iha luta mak mate ka moris ukun rasik-án iha prosesu ne’e ema barak mak mate hodi liberta Nasaun no povu.
Nasaun ita liberta ona no agora luta nafatin hodi liberta povu ho hisik kosar. Luta liberta povu agora ho hisik kosar ne’e konseitu maibé asaun konkretu husi hisik kosar ne’e mak serbisu maka’as.
“Agora universidade, ema hothotu tenke ko’alia katak mate ka moris estuda maka’as no serbisu maka’as”, afirma diretór departamentu Polítika Públika, Fakuldade Siénsia Sosiál ne’e iha Kampus Kaikoli, kuarta (17/5).
Serbisu atu hetan rendimentu hodi hadi’a moris no koñesimentu maka’as atu ema labele dehan ita la matenek tanba halimar de’it.
“Iha globalizasaun, matenek ema bele hetan iha fatin ne’ebé de’it”, nia akresenta. Tanba ne’e akademiku ne’e hateten katak estudante, universitáriu no ema hotu presiza serbisu maka’as nomós estuda nafatin.
Jornalista: Rafy Belo
Editora: Rita Almeida
