DILI (TATOLI)—Prezidenti Partidu Libertasaun Popular (PLP), Taur Matan Ruak, afirma katak, dignidade PLP labele faan tan osan tanba Taur nia prinsipiu katak, osan sei la bele sosa nia dignidade.
“PLP la bele faan nia dignidade atu buka osan. Ha’u nia mehi, terus no mataben tuka de’it ba ha’u, la bele ba ha’u nia oan no bei-oan sira,” Eis Prezidenti da Repúblika Taur Matan Ruak alerta iha nia diskursu, iha kongresu PLP, iha Salao Delta Nova, Sabdu (20/05) lokraik.
Taur husu atu PLP iha polítika tenki komunga atetude fleksibilidade, liu-liu oinsa mak halo esforsu oin-oin hodi promove integrasaun sidadaun sira iha prosesu dezenvolvimentu. Basa povu Timor-Leste, nu’udar povu ida lutador.
Juventude sira tenki hatene katak, ohin loron ema konsidera tempu ne’e osan mean hanesan iha lian Inglês hatete, Time is money and Time is life nune’e juventude aliserse ba nasaun Timor, la bele lakon tan tempu hodi partisipa iha prosesu dezenvolvimentu.
“Ha’u hakarak fó hanoin katak, atensaun ba adaptasaun evolusaun mundu ohin loron nian hodi adapta mudansa ne’ebé mak iha liga ba realidade Timor nian, so nune’e de’it mak Timor sei la sente mesak iha prosesu adaptasaun mundu nian,” Taur fó hanoin.
No husu atu timor-oan hotu tenki komunga no konsilida esperitu toleransia hodi hanoin katak, timor ne’e ba timor-oan tomak, maske timor-oan iha diferensia rasa, étniku, relijaun, polítika no estatus sosiál.
(Jornalista : Rafi Belo)
(Editór : Manuel Pinto)
