DILI, (TATOLI) – Reprezentante Polísia Nasionál Timor-Leste (PNTL), Andre de Carvalho apela ba motorista sira katak iha data ne’ebé markadu, loron 2 juñu sei hala’o parade karavana husi Tasi-Tolu to’o Largo Lesidere no husu utilizadór rodoviáriu atu buka dalan alternativa seluk.
“Iha kruzamentu no entrokamentu balun polísia tránzitu sei taka no husu ba utilizadór via públika katak rute ne’ebé marsa atu liubá, bainhira ita-boot sira hakarak hala’o viajen ruma buka dalan alternativu seluk ho nune’e bele fó asesu ba marsa refere”, Andre aviza.
Aleinde ne’e, husu partisipante husi grupu 67 ne’ebé partisipa iha karavana atu mantein pontualidade hodi nune’e marsa bele la’o ho seguru no koduzivu.
“Tanba ita hein malu to’o tarde hamosu engarrafamentu iha dalan publiku”, nia dehan iha Sentru Konvensaun Dili, ohin.
Parade ho tópiku “Haburas no Dezenvolve Rai Doben Timor-Leste” ne’e sei hahú iha tuku 03.00 loraik no hetan seguransa husi Polísia Tránzitu no Seguransa Sivíl.
Xefe Departamentu Diresaun Nasionál Seguransa Patrimóniu Públiku, Mario Exposto hatutan, ba rute parade, Seguransa Sivíl sei apoiu PNTL no husu partisipante tenke la’o ho dixiplina to’o fatin determinadu.
Diretór Jerál Turizmu, Ministériu Turizmu, Arte no Kultura, Aquilino Santos Caeiro hatete envolvimentu grupu 67 iha Karavana Artístika atu promove nasaun ba rai-liur no mantein trankuilidade tanba Timor-Leste sei selebra festa demokrasia iha loron 22 jullu 2017 liuhusi eleisaun.
“Ho atividade ida hanesan ne’e, ita sei hatudu katak Timor-Leste moris iha armonia no pás nia laran. Tanba ne’e mak meiu ida atu halo promosaun liuhusi atividade ida ne’e, hatudu ba mundu mezmu iha atividade importante ne’ebe atu define nasaun nia futuru nomós liuhusi atividade sira ne’e hatudu katak ita moris iha dame nia laran”.
Kreatividade importante tanba liuhusi ne’e bele kontribui ba dezenvolvimentu tuir ida-idak nia área. Kultura, turizmu no parte sira ne’ebé importante tebes ba kresimentu país no tinan-tinan kreatividade aumenta ba beibeik.
“Promosaun liuhusi meiu oioin. Ita-boot sira-nia partisipasaun apoiu ona Governu liuhusi ita-nia kreatividade no envolvimentu iha parte hotu”.
Jornalista: Maria Auxiliadora
Editora: Rita Almeida
