DILI, (TATOLI)-Ministériu Turizmu, Arte no Kultura (MTAK) sei realiza Eventu Karavana Artístika iha loron 2 Juñu hanesan programa ikus Ministériu durante tinan lima, iha VI governu Konstitusional. No espera governu foun sei kontinua programa Karavana.
Eventu Karavana Artístika sei realiza ho tema : “Haburas no Dezenvolve Rai Doben Timor-Leste” sei partisipa husi grupu 67 husi munisípiu no nasionál.
Koordenadór Jerál Eventu Karavana Artístika, Maria Ernestina Lopes hatete karavana ida ne’e, atu preserva kultura liuhusi kreatividade ne’ebé importante tebes.
“Tinan ida ne’e, ema barak entuziazmu ba rejista maibé tanba kritériu nune’e minimiza to’o 67 grupu de’it,” Maria Ernestina informa iha konferénsia imprensa ne’ebé hala’o iha Sentru Konvensaun Dili, ohin.
tuir ajenda atividade ne’e sei hahú tuku 03.00 loraik ho parade husi Tasi-Tolu to’o Largo Lecidere.
Iha 2016 Karavana Artístika hahú mós husi Tasi-tolu to’o iha Palasiu Governu ne’ebé partisipa husi grupu artísitika iha Dili no munisípiu, ne’ebé realiza no finansia hosi Ministeriu Turizmu Arte no Kultura ho Orsamentu Jerál Estadu 2016, iha loron 29 Abríl.
durante ne’e kada tinan-tinan ministériu sempre organiza programa ida ne’e hahu iha Governu Konstitusionál dalimak nian to’o iha VI Governu.
To’o ohin loron atividade Karavana realiza ba dala-lima ona no ida agora ne’e hanesan eventu ikus iha mandatu governasaun ida ne’e.
“Eventu ida ne’e, espera governasaun foun mai sei kontinua nafatin”, Maria Ernestina Lopes espera.
(Jornalista : Maria Auxiliadora)
(Editór : Manuel Pinto)
