DILI (TATOLI)—Lezadu Rui Maria de Araújo promete sei la lori Jornalista Timor-Post Raimundo Oki ba tama Kadeia no simu indemnizasaun hafoin desizaun ikus husi tribunál Distrital Dili, iha aban, Kinta (01/06).
“Ha’u hatete ba tribunál katak ida ne’e ha’u hakarak esklerese ba públiku no ha’u hakarak justisa esklarese ida ne’e, la’ós lori jornalista ba prizaun no husu indemnizasaun, maibé hakarak esklarese lia los,” Rui Maria de Araújo esplika ba jornalista sira iha Edifisiu Ministériu Saúde, Kuarta (31/05).
Rui rekuñese katak, nia haruka duni karta ida iha Tersa (30/05) ba Tribunál atu arguidu Raimundo Oki no Eis Diretór Timor Post Lorenco Vicente Martins atu esklarese loloos intensaun husi publikasaun notisia ne’e la’ós atu lori Jornalista ba kadeia no hetan indemnizasaun tuir lei haruka ba kazu Denuncia kalonioza.
“Hanesan lezadu ha’u mós iha lezitimidade ba ha’u nia direitu atu hatoo ha’u nia hanoin kona-ba akuzasoens sira ne’ebé mosu, tuir ha’u nia haree, primeiru ha’u lakohi indemnizasaun iha regras ne’ebé hatete ha’u hanesan lezadu ha’u bele husu indemnizasaun, ha’u la husu ida ne’e,” lezadu Rui reforsa tan.
Hodi hatutan “Kuandu tribunál husu ha’u hakarak saida, nune’e ha’u hateten, mai ha’u importante mak lia los ne’e tenki sai, tanba pedidu ida deskulpa fo sai iha jornal Timor Post momentu ne’eba la temi katak akuzasaun falsu mai ha’u, iha ne’eba ne’e temi deit erro factual.”
(Jornalista:Agapito dos Santos).
(Editór : Manuel Pinto)
