DILI, (TATOLI)- Vise-Ministru Finansas, Helder Lopes esplika, objetivu Governu halo Reforma Fiskál atu aumenta reseita doméstika ba Estadu hodi hamenus dependénsia ba fundu minarai no hametin efisiénsia no efikásia iha despeza públika.
“Iha Reforma Fiskál ne’e, iha área tolu mak ita hakarak halo, primieru mak atu halo polítika iha área fiskál nian, segundu, ita tenke hatuur enkudramentu legál ne’ebé própriu no loloos iha area fiskál nian no terseiru oinsá atu hadi’a no hametin instituisaun sira ne’ebé servisu iha setór fiskál hodi hametin efisiénsia no efikásia em termo de hala’o sira-nia knaar,” Helder dehan iha Salaun Ministériu Solidariedade Sosiál, Dili, ohin ihá ámbitu Espozisaun Reforma VI Governu Konstitusionál.
Atu alkansa komponente tolu Reforma fiskal, oras ne’e dadaun, Komisaun Reforma Fiskál servisu ho entidade relevante prodús ona lei ida ne’ebé define orgánika ba Autoridade Impostu no Alfándega nomós kódigu ba Alfándega nian.
Hein katak, ho lei sira ne’e, autoridade rua ne’e bele iha enkuadramentu legál própriu para sira bele ezerse sira-nia servisu.
Aleinde ne’e, Timor-Leste mós iha ona faze finál revizaun lei Tributária, problema, mak seidauk aprezenta ba Konsellu Ministru tanba iha konteúdu balun lei ida ne’e liga ho reseita ne‘ebé mai husi tasi Timór.
Nune’e Governu ho kuidadu tebes haree ba revizaun lei ne’e tanba konteúdu liga ho reseita minarai no tasi Timór, liga mós ho esforsu kona-ba negosiasaun Fronteira Marítima. Ho ida ne’e Governu hakarak haree asuntu ho kuidadu tebes atu nune’e esforsu hotu ne’ebé halo suporta malu hodi atinje objetivu.
(Jornalista : Maria Auxiliadora)
(Editór : Manuel Pinto)
