DILI, (TATOLI) – Reuniaun Konsellu-Ministru nian ohin, revé fali artigu ida kona-ba Murak Rai Timor, SA no hetan ona aprovasaun, nune’e sei haruka fali ba Prezidente Repúblika atu promulga.
Murak-rai Timór, SA ne’e sei sai hanesan sosiedade komersiál direitu privadu nian no kapitál integrál públiku. Medida ne’e tama iha estratéjia Governu nian kona-ba harii instituisaun sira ne’ebé presiza atu garante dezenvolvimentu setór ekonómiku ida ho nia poténsia boot no kontribui ba diversifikasaun ekonomia nian, ne’ebé maka fundamentál ba país ne’e.
Ministru Petróleo no Rekursu Minerál, Alfredo Pires ba TATOLI iha Palásiu Governu hatete, bainhira artigu ne’e promulga ona maka foin bele implementa.
“Iha artigu ida de’it mak presiza alterasaun kona-ba ita-nia kompañia nasionál Murak Rai Timór. Kompañia ne’e mak sei haree ba ita-nia osan-mean, manganés, ita-nia rikusoin boot daruak, entaun importante uitoan ba nasaun”.
Hein lei aprova husi Prezidente depois lori ba oin no governasaun foun mai mak bele implementa tanba Lei ne’e importante ba nasaun, nune’e Prezidente sei fó atensaun di’ak ba ba lei ida ne’e.
Hafoin lei promulga, sei nomeia ema hanesan prezidente, vise-prezidente, konsellu administrasaun no fiskál nian ba Murak Rai Timór, SA no sei la’o tuir prosesu.
“Husi ami-nia parte saida mak ami bele halo to’o ami-nia mandatu remata depois ita pasa ba Governu foun”, ministru hato’o.
Jornalista: Maria Auxilidora
Editora: Rita Almeida
