DILI, (TATOLI)-Kompañia Sai Seico ne’ebé Governu fó lisensa iha tinan 2010 no remata iha 2011 lakontinua tan nia lisensa hodi halo peska industriál ba ikan Atún iha Kosta Súl ne’e agora atraka de’it iha ponte-kais Com.
Xefe Departamentu Kaptura, Lisensiamentu, Pós-Kolleita no Jestaun Kualidade Peskadu, Ministériu Agrikultura no Peska, Joni Freitas hatete espera kompañia atu estende nia lisensa maibé laiha informasaun no rona katak iha konflitu internál iha kompañia nia laran hafoin ministériu hatene bainhira ró ida atu mout ona.
Ho problema ró ne’ebé paradu ne’e halo komunidade Com preokupa no husu ministériu relevante atubele hasai ró tolu husi tasi laran tanba halo ambiente tasi haree ladi’ak.
“Ne’e mak nia (responsavel empreza ne’ebé hasai ona) foin haruka fali surat ida mai katak kompañia hasai tiha nia iha 2014 maibé problema mosu ona mak nia foin deklara. Ami ezije nafatin nian tanba uluk sira mai foufoun, nia mai ho karta delegasaun husi sentrál, sira-nia big boss naran Park Dong fó karta delegasaun katak nia mak hanesan kaer kompañia Sai Seico Timór no até agora hakerek surat dehan nia sai ona mas ami lahetan surat husi ne’ebá, entaun ami ezije nafatin nia tenke rezolve problema ne’e,” Joni informa ba TATOLI iha Komoro, ohin.
Tuir Joni, empreza ne’e halo esportasaun ikan atún fresku ba Japaun tanba iha dezintendimentu iha kompañia laran, nune’e produtu to’o iha ne’ebá nia presu tun no na’in iha Timór lafoku ba peska entaun na’in iha Japaun hasai tiha responsavel iha Timór ho naran Kanzi no troka ho Kim maibé karta ida troka ne’e lato’o ba ministériu.
Ho ró ne’ebé atraka ponte-kais Com, ministériu ezije ba kompañia atu rezolve problema ró ne’ebé lahalo atividade peska ne’e.
Enkuantu ró ida husi empreza ne’e, ida mout ona iha portu Com nian no tékniku sira buka meiu atu dada sai maibé lakonsege no ko’alia ho parte naval maibé husu folin ne’ebé aas nune’e seidauk bele hasai no hein empreza atu sosa tali hodi tékniku sira bele hasai ró sira ne’e.
(Jornalista : Maria Auxiliadora)
(Editór : Manuel Pinto)
