DILI (TATOLI) –Partidu Polítiku hamutuk 31 inklui bloku koaligasaun horseik, Kuarta (07/06) asina ona paktu unidade nasionál, iha Salaun Ministériu Negósiu Estranjeiru no Kooperasaun (MNEC), Praios dos Coceirros ho objetivu garante estabilidade iha elisaun parlamentar, liu-liu hadok án hosi aktu insulta malu iha kampaña.
Vice Prezidenti Comisaun Nasionál Elisaun (CNE), Duarte Tilman realsa paktu ne’e aleinde de garante estabilidade iha seguransa, evita mós atu lider partidu sira iha kampaña labele insulta malu.
“Asina paktu unidade nasionál importante atu labele insulta malu iha âmbitu festa demomrasia,” Vise Prezidente CNE, Duarte Tilman, esplika, iha MNEC horseik.
Paktu ne’e mós prevensaun violénsia eleitorál hodi garante estabilidade, integridade no unidade nasionál iha Repúblika Demokrátika Timor-Leste (RDTL).
Vise Prezidente CNE, Duarte Tilman mós husu atu partidu polítiku sira kumpre duni inisiativa asina paktu ne’e atu iha kampaña labele iha perturbasaun festa demokrasia.
paktu unidade nasionál asina hosi partidu sira hanesan ASDT, BUP (PMD, PLPA, PDRT), CNRT, CASDT, FRETILIN, FRENTE MUDANSA, KHUNTO, PD, PDN, PLP, PUDD, UDT, PSD, UNDERENTIM, APMTL, PR, MLPM, PPT, enkuantu partidu sira seluk ne’ebé la marka prezensa iha asinatura ne’e hanesan PDN, PEP, PST, PDL, PARENTIL, PTD, PDP, PPT no PNT.
Iha partidu balun la marka prezensa maibe unidade nasionál ema hotu komunga iha estadu direitu demokrátiku. kuandu sira halo konfrontu ruma iha âmbitu festa demomrásia tenke prosesa tuir lei,” Duarte Tilman dehan.
Entertantu Partidu polítiku kompromete katak poder polítiku nia hun mak povu nia vontade polítika, nune’e polítiku nain sira sei esforsu makas ho matenek no badinas tuir prinsipiu demokrásia hodi manan konfiansa povu nian ho dignu iha eleisaun lejislativa 2017, enkuantu povu nia votu mak determina partidu nia vitória eleitorál.
ParPol hakarak sai parseiru responsavél iha prosesu konstrusaun estadu demokrátiku no festa demokrásia hodi bele la’o ho dame no dezenvolvimentu nasionál ne’ebé nakonu ho posibilidade no oportunidade ne’ebé midar, murak no justu ba Timoroan hotu.
Hakarak sai autór konsolidasaun demokrásia tanba sei la tolera komportamentu violénsia eleitorál tanba bele hamonu kualidade prosesu eleitorál hatun dignidade no prestijiu RDTL iha mundu internasionál.
ParPol hakarak kompromete-an ho komportamentu disiplinár totál durante kampaña eleitorál iha komunidade nia le’et hodi hakribi hahalok subornu no sei la sosa votu ne’ebé destroi Timoroan nian integridade no ses-an hosi hahalok direitu politiku.
Hakarak kontribui pro-ativamente ba hametin estabilidade nasionál hodi bele haburas dezenvolvimentu iha nasaun ne’e, enkuantu tenke evita liafuan moruk no kroat hodi hasoru malu durante kampaña eleitoral.
Respeita rezultadu eleitorál iha festa demokrásia ho hakruk ba desizaun no vontade populár, nune’e ema hotu nia responsabilidade konstitusionál hodi garante eleisaun ho dame, livre, direitu, kredivel, justu no transparante.
Kontinua koopera ho estadu no autoridade kompetente depois anúnsiu rezultadu eleitorál iha eleisaun hodi hamutuk garante dame no ordem públiku to’o formasaun definitivu governu RDTL iha periódu 2017-2022.
Apela ba Timoroan hotu hodi servisu hamutuk hanesan maun alin hodinkonsolida estadu direitu demokrátika ne’ebé moris ho dame, armónia sosiál hodi haburas prospriedade ba sidadaun hotu.
(Jornalista : Zezito Silva).
(Editór : Manuel Pinto)
