OE-CUSSE (TATOLI)—Komunidade Oe-Cusse hosi suku 18 iha Rejiaun Administrasaun Espesiál Oe-Cusse Ambeno (RAEOA), hato´o sira nia preokupasaun ba Prezidenti Repúblika, Dr. Francisco Guterres Lú-Olo.
Preokupasaun sira ne´ebé maka komunidade sira hato´o maka komunidade balun seidauk asesu ba bee-moos, eletrisidade, veteranu sira kestiona kona-ba simu osan subsídiu ki´ik no profesór balun preokupa ba saláriu ne´ebé ki´ik.
Kestaun sira ne´e komunidade sira levanta iha sorumutu loron sorin entre prezidenti repúblika no reprezentante partidu polítiku sira iha salaun Parókia Nossa Senhor do Rosario de Fátima, Suku Costa, Sub-Rejiaun Pante Makasar, RAEOA, sábadu ne´e.
Iha biban ne´e, Prezidenti Repúblika, Dr. Francisco Guterres Lú-Olo responde katak Prezidenti Repúblika hanesan órgaun soberania ida, sei asumi preokupasaun ne´ebé komunidade sira hato´o ba nia.
Nia esplika katak prezidenti repúblika bele sai solusaun ba problema hotu kuandu problema ne´e kabe ba kompeténsia Prezidenti Repúblika tuir Konstituisaun. “Ha´u asumi Prezidenti Repúblika seidauk to´o fulan ida, tan ne´e buat sira ne´ebé ita-boot sira aprezenta, ha´u sei la fó solusaun direta maibé sei túr hamutuk ho governu foun ne´ebé mai atu buka solusaun ba problema refere,” Lú-Olo tenik.
Kona-ba komunidade iha área rurál ne´ebé seidauk asesu ba eletrisidade, Lú-Olo simu informasaun hosi Prezidenti Autoridade RAEO, Dr. Marí Alkatiri katak kapasidade sentru elétrika iha Oe-Cusse ne´e boot teb-tebes, ne´e duni oras ne´e autoridade RAEOA halo serbisu namanas hela atu dada eletrisidade ba komunidade sira ne´ebé seidauk asesu enérjia iha Oe-Cusse laran tomak. (Jornalista: Xisto Freitas)
