DILI (TATOLI)—Vise Ministru Finansas, Helder Lopes relata, hahu aprosaun Orsamentu Jeral Estadu (OJE) to’o agora ezekusaun hosi instituisaun estadu hotu atinji pursentu 40 resin husi total OJE dolar Amerikanu hamutuk billoens 1.3.
“Ezekusaun orsamentu husi instituisaun estadu tomak to’o ohin loron atinji ona pursentu 41,9 ho total osan dolar Amerikanu milloens 451.9 husi totál orsamentu Jerál Estadu,ʺ Helder Lopes dehan ba Jornalista sira iha Palasiu Governu, Tersa (13/06).
Entertantu Helder mós rekuñese katak, atividade kampaña partidu polítiku sei la difikulta prosesu ezekusaun orsamentu estadu iha mandatu Sexto Governu.
Iha tinan 2017 Parlamentu Nasionál aprova orsamentu ho totál dolar Amerikanu Billoens 1.3. enkuantu iha tinan 2016 PN aprova orsamentu billoens 1.9 resin ne’ebé soma ho Orsamentu Ratifikativu.
Iha fatin hanesan Vise Ministru Financas, informa, funsionariu Ministériu Finansas okupa ona edifisiu foun Ministériu nian, iha Ai-tarak Laran hafoin kompaña finaliza prosesu instalasaun data center no fornesementu ekipamentu servisu.
No edifisiu tuan oras dirasaun nasionál Alfándega no diresaun jerál impostu maka sei okupa.
Enkuantu diresaun patrimoniu estadu mantein iha Balide no diresaun jerál statistika iha Kaikoli.
Ba edifisiu foun andar rua entrega ba dirasaun autoridade nasionál Petroliu-ANP maka okupa enkuantu andar 10 okupa husi funsionariu Ministériu Finansas.
ʺAmi muda ba ne’eba hahú semana rua liuba no iha semana kotuk maka ami muda hotu, ʺ Helder konta tuir.
Entretantu, Projeitu ne’e konstrui husi kompaña PT.PP-Persero Indonézia ho totál orsamentu dolar Amerikanu milloens 27 resin.
(Jornalista:Agapito dos Santos, Editór : Manuel Pinto)
