DILI (TATOLI)– Ministra solidaridade sosiál, Isabel Amaral Guterres, autoriza ona Vise Ministru ministru Solidaridade sosiál, Miguel Marque Manetelu hodi lisensa atu tuir kampaña, maibé iha semana ne’e nia laran Manetelu sei submete karta lisensa ba Primeiru-Ministru Rui Maria de Araújo.
“Ha’u sei hatama karta lisensa espesiál ba Primeiru Ministru Rui Maria de Araújo iha semana ida ne’e hodi partisipa kampaña Partidu Politiku CNRT ba eleisaun Parlamentár, autorizasaun hosi Ministra Isabel Amaral Guterres,” Miguel Manetelu informa ba jornalista sira iha Palasio Governu, horseik.
Lisensa ne’ebé mak Manetelu husu ho karakter lisensa ho obsaun espesiál hodi partisipa kampaña durante fulan ida.
Ba membru Governu sira ne’ebé naran tama lista kandidatu ba parlamentu nasionál iha direitu foti lisensa atu ba halo kampaña, sein halo rejignasaun hosi kargu membru governu.
Iha Parte seluk, Vise Ministra Edukasaun, Dulce de Jesus Soares hateten, sei halo koordenasaun ho Vise Ministru Abel Larisina hodi garante funsionamentu instituisaun durante kampaña.
Ministru Edukasaun deside ona lisensa, maibe Vice nain rua ne’e seidauk deside, maibe iha tempu besik sira mós sei halo dezisaun hodi halo lisensa ba tuir kampaña.
Entertantu Sekretariu estadu Konselhu Ministru Avelino Coelho, tuir planu iha semana ne’e sei aprejenta karta lisensa hodi hala’o kampaña ba Partidu Sosoalista Timor (PST).
(Jornalista:Agapito dos Santos, Editór : Manuel Pinto).
