LIQUIÇA (TATOLI)—Prezidenti Repúblika, Dr. Francisco Guterres Lú-Olo haksolok lori Estadu no veteranu nia naran mai hamutuk ho povu Liquiça hodi dignifika saudozu sira hosi Munisípiu Liquiça nia restus mortais.
“Sira nia sakrifísiu hirak ne´e maka ohin loron ita hamriik nu´udar povu ida ho nia istória rasik, kultura rasik, neon rasik no hakarak rasik,” Lú-Olo hato´o lia hirak ne´e liuhusi nia diskursu iha seremónia haloot saudozu sira hosi Munisípiu Liquiça nia restus mortais hamutuk 260 iha Jardim dos Herois, Suku Dato, Postu Administrativu Liquiça Vila, kuarta ne´e.
Tuir Prezidenti katak istóriu funu ba libertasaun ne´ebé saudozu hirak ne´e involve direta iha laran la´ós reprezenta ema ida ka rua nomós etnia ida ka rua maibé reprezenta mehi koletivu no vontade koletivu.
“Liquiça la´ós lakon de´it ema 260 ne´e maibé Liquiça oan balun moris iha fatin seluk, halo funu iha fatin seluk no mate iha fatin seluk iha rai doben ida ne´e. Ha´u fó hanoin de´it katak Liquiça-oan ida ne´ebé ita hotu-hotu hatene ninia istória maka Saudozu Nicolau Lobato nu´udar Prezidenti FRETILIN no Prezidenti RDTL iha periodu rezisténsia. Liquiça-oan ida ne´e (Nicolau Lobato) foti nia neon ás iha kedas portugés nia ukun hanoin tiha ona oinsá kore povu tomak hosi ema seluk nia ukun,” Lú-Olo haktuir.
Iha biban ne´e, reprezentante família hosi saudozu sira hosi Munisípu Liquiça, Leandro Grei hateten sira la senti tristi ho sira nia família ne´ebé mate tanba sira mate la´ós nar-naran maibé mate ba kauza libertasaun nasionál.
“Ami haksolok tanba ho sira nia mate nia rezultadu maka ohin loron ita hamriik ona hanesan nasaun soberanu. Ami la ezije justisa ba funu maluk sira maibé ami husu de´it maka oinsá hatudu ami nia aman no maun alin sira nia rate,” Grei informa. (Jornalista: Xisto Freitas)
