DILI (TATOLI)—Prezidente Partidu Repúblikanu (PR) João Mariano Saldanha promote katak, se PR mak ka’er pasta hanesan ministru ba rai no propriedade iha governasaun foun VII Governu Konstitusionál sei halo Uma Moris Di’ak (UMD) 500 iha munisipiu iha tinan lima nia laran.
“PR la hetan kadeira iha Parlamentu Nasionál tinan ida PR halo UMD ba povu kbiit la’ek ho PR nia osan rasik, bainhira ka’er ukun nu’udar ministru ba rai tinan ida halo uma 100 iha munisipiu,” Prezidenti PR João Mariano Saldanha, promote hafoin halo lansamentu fatuk-ain ba UMD iha aldeia Becussi Sentru, Suku Becora, Postu Administrativu Kristu Rei, Municipiu Dili, Tersa (20/06).
Bainhira PR hetan asentu iha Parlamentu Nasionál, Prezidenti PR ne’e hakarak halo UMD iha tinan ida uma hamutuk lima, nune’e iha tinan lima nia laran PR sei harii UMD hamutuk 25 ba ema kbiit la’ek sira ho osan Partidu PR nian liu-liu osan subensaun Partidu nian.
Enkuantu UMD ne’ebé lansa ona iha Becussi, Tuir eis senior asessor ekonomia iha Ministériu Finansas ne’e, hakarak hatudu realidade ba kbiit la’ek sira katak, prontu lori osan rasik hodi harii UMD ba povu kbiit la’ek sira.
Programa polítiku PR 2017-2022 bainhira PR hetan fi’ar, prioridade dahuluk mak Uma Moris Di’ak, Be Moris Di’ak, Servisu Moris Di’ak, no Funu Hasoru Korrupsaun.
Iha area ekonomia, PR iha programa ida ne’ebé hanaran Kreditu Moris Di’ak. Tau osan $100.000.000 (tokon atus ida) ba Banku BNCTL iha tinan lima nia laran atu fó kreditu ba setór privadu ho funan pursentu 4-7 ba debe sira.
Objektivu hosi kreditu ne’e atu hamoris kompaña mikro, kiik, ho mediu, loke servisu ba jovem sira, ho haburas area rural.
Ba Administrasaun ho Polítika, PR promove burokrasia ida ne’ebé lais no mamar, ezemplu sei la iha tan liña naruk bainhira ema hakarak trata Pasaporte, legalize diploma, trata surat lori kareta, kontratu rai, no seluk-seluk tan.
Polítika internasionál ba integrasaun Timor-Leste tama ASEAN, PR sei promove komersiu ho industria, hasa’e koalidade edukasaun, hasa’e kompetitividade nasionál, ho loke servisu ba ema Timor iha nasaun sira seluk.
(Jornalista : Julia Chatarina, Editór : Manuel Pinto)
