DILI (TATOLI) – Prezidente Repúblika (PR), Francisco Guterres Lu Olo konsidera haksesuk eh debate partidu polítiku (ParPol) sira ho intensaun hodi fó sai programa atu konvense konfiansa ba povu hodi determina direitu votu iha 22 Jullu.
“Maluk reprezentante partidu polítiku sira hamutuk iha fatin ne’e atu haksesuk oin ba oin kona-ba programa polítiku saida mak ida-idak hanoin atu hala’o, nune’e bele lori konfiasa povu nian ba tur iha orgaun lejislatura no kaer governu tinan lima tuir mai,” Lu Olo hato’o iha nia intervensaun ba debate ParPol iha Salaun Laline Larigutu Komisaun Nasionál Eleisaun, Kaikoli, Segunda (17/7).
Tuir xefi estadu ne’e, debate ParPol sei koalia klean no klaru, ho matenek no laran moos ba povu tomak liu-liu militante sira atu ida-idak hili tuir kompromisu programa ne’ebé fó sai ho hanoin atu hamenus kiak no hala’o dezenvolvimentu iha Timor-Leste.
“Ha’u fiar katak ParPol sira nia kna’ar hotu sei la’o ho susesu atu sidadaun sira bele hili liuhosi votu sekretu ba partidu ou koaligasaun partidaria atu ba tur iha parlamentu nasionál no hatur governu ba tinan lima tuir mai,” Lú Olo hato’o.
Hodi akresenta, kompromisu ParPol tuir duni regra konstitusionál ho intensaun atu fó hanoin no haforsa ParPol no sidadaun sira nia dever ho responsabilidade hodi kontribui ba páz no estabilidade ba nasaun Repúblika Demokratika Timor-Leste (RDTL).
“Ambiente páz ho estabilidade iha kampaña polítiku mai hosi esforsu hotu-hotu nian tantu hosi Ministériu Interiór no Komisaun Nasionál Eleisaun tanba konvida partidu polítiku sira konkorente atu asume kompromisu sinál simu malu liuhosi paktu unidade nasionál ne’ebé asina iha 14 Jullu 2017,” Lú Olo louva.
Hodi kontinua husu ba povu Timor-Leste atu vota iha 22 Jullu, tanba sidadaun nia votu importante tebes ba Timor-Leste, liu-liu haburas demokrásia no bele hala’o dezenvolvimentu tuir programa ne’ebé determinadu.
“Ita sei tulun malu, servisu hamutuk ho vontade tomak atu hala’o dezenvolvimentu integradu no sustentavél ba jerasaun sira Timor-Leste nian” Lú Olo enkoraza.
(Jornalista : Zezito Silva, Editór : Manuel Pinto).
