DILI (TATOLI)-Prezidente Repúblika Francisco Guterres Lú Olo, Ohin, Segunda, (17/07) rona briefing (esplikasaun) hosi Komandante Polísia Nasionál Timor-Leste (PNTL), Komisariu Júlio Hornay ho nia estruktura Nasionál no Munisipiu sira iha Iha Kuartel Jerál PNTL, Kaikoli, relasiona ho Planu PNTL atu halo reforma ba nian membru ne’ebé atinzi ona idade 60 iha futuru.
ʺKomandante PNTL halo aprezentasaun konaba nesesidades atu halo reforma iha PNTL nia laran, liliu ba sira nia ema ne’ebé tama ona iha idade reforma, presiza lejislasaun ida atu defini sira ninia estatuto,ʺ Prezidente Repúblika haktuir hafoin hala’o visita ba Kuartel Jerél PNTL Kai-koli Dili, ohin.
Lú Olo fi’ar katak iha governasaun ne’ebé sei mai (VII Governu), sei tau atensaun ba nesisidade PNTL nian, liu-liu kona-bá polítika reforma.
Aleinde ida ne’e, tuir Lú Olo ba futuru presiza kria autoridade ida atu akumula Instituisaun PNTL no FALINTIL-FDTL hodi funsiona di’ak liutan iha prestasaun servisu nian lor-loron
Entertantu Lú Olo hanesan xefi estadu apresia ho prestasaun servisu ne’ebé PNTL no FALINTIL-FDTL hatudu durante kampaña eleisaun Parlamentár tanba la’o ho hakmatek.
ʺHa’u fiar iha tempu oin, sira (PNTL )sei hala’o servisu ne’e di’ak líutan, hamutuk ho FALINTIL-FDTL iha ne’ebé PNTL mós hola parte iha konseitu estratéjiku forsa defesa nian para aban bairua governu foun mai bele hadia di’ak liutan instituisaun rua ne’e, maski ida-idak ho ninia atividade ketak-ketak,ʺ Lú Olo esplika.
Iha enkontru entre xefi estadu ho Komando PNTL, parte PNTL aprezenta mós numeru asidenti trafigo ne’ebé kontinua rejista maka’as, krime ofensas korporais, violasaun sexsual, droga, trafiku umanu no kontrolu migrasaun liliu ba sidadaun estrangeiru ne’ebé tama no sai iha teritoriu.
(Jornalista:Agapito dos Santos, Editór : Manuel Pinto).
