DILI, (TATOLI) – Prezidente Parlamentu Nasionál (PN) foun, Aniceto Guterres ho nia estrutura meza hanesan Vise Prezidente PN, Júlio Sarmento Meta Mali ho António Verdial no Sekretaria meza PN sira hala’o sorumutu dahuluk ho Prezidente Repúblika, Francisco Guterres.
Objetivu hosi enkontru ida ne’e halo aprezentasaun kona-ba estrutura meza PN ne’ebé foin eleitu iha loron 5 fulan-setembru liu-ba.
“Hafoin estrutura meza PN kompletu, ami mai komprimenta Prezidente Repúblika hodi hatudu sentidu kooperasaun, sentidu solidariedade institusionál entre órgaun Estadu”, Prezidente PN, Aniceto Guterres ba jornalista sira iha Palásiu Prezidente Nicolau Lobato, Bairu-Pité, kinta ne’e.
Sorumutu ne’e, Prezidente PN ho nia estrutura mós aproveita konvida direta Prezidente Repúblika atu loke sesaun dahuluk lejizlativa iha kuarta lejizlatura iha 15 setembru, tinan ne’e.
Enkuantu, Xefe Estadu, Lú Olo mós felisita estrutura meza PN foun no membru sira ne’ebé konsege susesu forma estrutura meza.
Aniceto informa, oras ne’e sira seidauk bele deskuti no aprova lei ruma tanba sei foku liu-ba transferénsia periodu lejizlatura da-toluk ba da-haat.
“Konferénsia líder bankada mós foin atu hahú iha aban. Maibé, iha ha’u nia diskursu hafoin eleitu ha’u dehan ona katak iha ajenda barak atu introdus iha lejizlatura ne’e”, tenik.
Hatutan tan, tanba kestaun étika polítika, nia mós sei rejistu ninia rikusoin ba Tribunál Rekursu, nune’e bele fó sai ba públiku.
Jornalista: Xisto Freitas
Editora: Rita Almeida
