DILI (TATOLI) –Ministru Prezidénsia Konsellu Ministru (PCM-sigla Portugés) VII Governu Konstitusionál, Adriano do Nascimento promete sei halo esforsu másimu atu bele fó kontribuisaun ba estadu no nasaun hosi fiar ne’ebé atribui ba nia durante tinan lima.
“Ha’u sei esforsu másimu atu bele fó kontribuisaun, klaru sei iha dezafiu oin-oin mas nu’udar ema ita sempre hakat liu husi dezafiu hirak ne’e nune’e bele aprende lisaun no hakat ba oin ho di’ak,” Adriano Nascimento haktuir ba Ajénsia TATOLI iha Parlamentu Nasionál, Sesta (15/09).
Planeamentu, ezekusaun no hatuur sensibilidade polítika, nu’udar dezafiu ne’ebé Adriano identifika bainhira simu knaar PCM maibé hanesan lider polítika ida, Nia tenke iha konfiansa no esperansa tanba ho konfiansa no esperansa mak bele motiva povu bele hola parte iha prosesu dezenvolvimentu nasionál.
“Nu’udar umana bainhira la hakat liu dezafiu hirak ne’e mak sei nunka aprende no hateke saida mak ita halo di’ak ka at iha pasadu no nunka mós previzaun ba oin oinsá mak ita bele la’o hodi halo adaptasaun ba dinámika moris nia.” Adriano haklaken
No promete “Ha’u prontu atu hakás an ho fiar ne’ebé mai husi partidu rua FRETILIN ho PD.”
Entretantu partisipasaun Adriano nian iha VII governu sei implementa tuir programa polítika Partidu Fretilín no Partidu Demokrátiku, maibé antes implementa sei tuur hamutuk hodi hare programa tinan lima nia, hare prioridade annual, no planu asaun annual tinan ida nian.
“Importante mak oinsá atu konsolida polítika iha kontestu konstrusaun estadu tanba ho kontestu ne’e mak tenke ba ho hanoin ida ne’ebé mak hare saida mak identifika no presiza hadi’a hafoin projeta ba oin,” Adriano reforsa. No promete tan “Ha’u iha sei hakás an atu halo di’ak liután iha instituisaun ne’ebé ha’u sei hala’o knar.”
Ministériu PCM antes ne’e okupa hosi Agio Pereira hosi V governu, VI Governu (tinan 10) no VII governu foin partidu Fretilín ho PD nu’udar nain ba governu, depozita konfiansa ba Adriano do Nascimento, no ohin lokraik tuku 04 : 00, Adriano hetan pose hosi Prezidente Repúblika, Francisco Guterres Lú Olo hodi kontinua Agio Pereira nia knar durante períodu 2017-2022, bazeia ba Dekretu Prezidente da Repúblika No 59/2017 de 15 de Setembru.
Profile Adriano do Nascimento
Adriano do Nascimento moris iha loron 12 fulan Janeiru 1970, iha Holbelis-Suco Labarai Distrito Kovalima. Agora daudauk, nia sai Deputadu Parlamentu Nasionál. Durante iha Parlamentu Nasionál nia mós eleitu hanesan Prezidente ba Grupu Amizade Parlamentar entre Timor-Leste no Japaun.
Nu’udar Deputadu iha Parlamentu Nasionál, nia mós serve iha komisaun espesializada rua hanesan Komisaun Infraestrutura no komisaun Negósiu Estranjeiru, Defeza no Seguransa Nasionál.
Iha Partidu Democratic, Adriano do Nascimento serve nu’udar Primeiru Vice Prezidente, eleitu iha Primeiru Kongresu iha fulan Outubru 2006. Molok ida ne’e, nia halo knar hanesan Sekretáriu Jerál Distrito Kovalima badala uluk, bainhira Partidu Democratic hari iha fulan Junho 2001.
Adriano do Nascimento graduadu hosi fakuldade Siénsia Edukasaun iha Universidade Nusa Cendana Kupang. Hafoin remata nia estudu, nia mós halo tan nia kursu iha area oi-oin iha rai liur hanesan; kursu ba Transformasaun konflitu iha Universidade Menonite, Virginia-Amerika, Kursu Dezenvolvimentu Paz iha Universidade Notre Dame, Indiana-Amérika. Nune mós nia halo Kursu ba Akompañamentu komunidade no governu lokál iha Australia. Halo mós halo kursu tékniku ba Planeamentu Programa no Orsamentu iha Bangkok-Tailándia.
Molok sai membru Parlamentu Nasionál, Adriano do Nascimento servisu iha organizasaun lubun ida. Iha tinan 1997-1998, nia sai professor iha eskola Pre Sekundária no Sekundária iha distritu Kovalima.
Iha tinan 1998, nia ho nia kolega lubun ida, hari no servisu iha ONG ida hanaran Conflict Management Group, ne’ebé agora nakfilak ba KSI (Kdalak Sulimutuk Institut).
Iha períodu rezisténsia, Adriano do Nascimento involve an iha rede klandestina hodi halo knar iha Seksaun Ajitasaun Polítika no Relasaun Internasionál iha Odir 12 de Outubru no sub Region 12 de Outubru, hafoin nakfilak ba CNRT.
Iha tinan 1998-2000, nia mós sai koordenadór jerál DSMPTT (Dewan Solidaritas Mahasiswa Pemuda dan Pelajar Timor Timur) Distrito Kovalima hodi halo kampaña ba ukun rasik an iha distritu refere.
Iha tinan 1998-1999, Adriano do Nascimento mós involve iha kampaña ba ukun rasik an iha rai li’ur hanesan Estadus Unidus da America, Irlanda, Inglaterra, Portugal, Belgia, no España.
Durante hala’o nia estudu iha Kupang, nia mós sai Prezidente ba Organizasaun IMPETU/IMAPTIM (Asosiasaun Estudante Timor Leste) ba tinan 1996-1997.
Hafoin Timor ukun an, hahú hosi 2000-2002, Adriano do Nascimento kontinua hanorin iha eskola Pre Sekundária no Sekundária iha Distrito Kovalima.
Iha tinan 2001, nia muda hosi Suai hodi servisu iha banku ANZ. Hafoin ida ne’e, iha tinan 2002-2003, nia muda fali nia servisu ba iha ONG La’o Hamutuk hodi sai peskizadór ba asuntu Mina no Gas iha Tasi Timor.
Iha tinan 2003-2006, Adriano do Nascimento servisu fali iha ONG internasionál (CRS/Catholic Relief Services) nu’udar Programa Manager ba programa Peace Building/Dezenvolvimentu Paz.
Iha forum internasionál, Adriano do Nascimento mós hola parte iha atividade lubun ida. Nia lidera Team Peace Building CRS Timor Leste hodi hola parte iha Regional Technical Meeting iha Philippine, Cambodia, Medan Indonesia. Hola parte mós iha Regional conference on Global Partnership for Prevention of Armed Conflict iha Manila, The Philippines.
Nia mós hola parte iha konferénsia/Second Catholic Peace Building Network Conference iha Davao City, the Philippines. Adriano do Nascimento mós sai oradór ba konferénsia “The Role of Civil Society in Conflict prevention and Peace building in East Timor” iha Phnom Penh, Cambodia.
Nu’udar ativista no lider polítiku, Adriano do Nascimento mós halo publikasaun no Nia sai Co-writer/hakerek Nain ba livru ida ho títulu “East Timor Testimony” ne’ebé publika iha tinan 2004 iha Canada.
Hanesan peskizadór ba asuntu mina no gas no asuntu inter ligadu sira seluk, Adriano do Nascimento mós hakerek artigu lubun ida kona ba mina no gas iha tasi Timor no problema sosiál sira seluk iha Diariu nasionál.
(Jornalista: Julia Chatarina)
(Editór : Manuel Pinto)
