DILI, (TATOLI) – Kompromisu Governu Konstitusionál ba da-hituk ne’ebé toma pose ona iha Palásiu Nobre Lahane, sesta (15/9), iha rua maka dezenvolve institusionál no relasaun externál.
Primeiru Ministru, Marí Alkatiri esplika dezenvolvimentu institusionál signifika atu reforsa kapasidade administrasaun ho kestaun hasa’e kapasidade rekursu umanu no rekursu finanseiru nomós dezenvolve relasaun internasionál liu-liu oinsá atu hakbesik-án ba mundu tomak, hametin amizade amigu ne’ebé iha ona no buka amigu foun atu fó vantajen ba povu no nasaun.
Obrigasaun seluk, nia esplika, hasa’e kualidade edukasaun ba timoroan sira, saúde di’ak, asesu eletrsidade, bee-moos, kria alimentasaun regulár liu no kompleta nomós abitasaun ne’ebé dignu.
“Governu mós sei fó prioridade ba dezenvolvimentu lejizlativa no institusionál iha ita nia sosiedade no Estadu ho vizaun ne’ebé globál no transversál ne’ebé sei konkretiza programa espesífiku hahú hosi nível komunitáriu liuhusi ekonomia setór privadu to’o adminitrasaun públiku governu”, Marí afirma.
Jornalista: Xisto Freitas
Editora: Rita Almeida
