DILI (TATOLI) –Deputadu Parlamentu Nasionál hosi Bankada Partidu Libertasaun Popular (PLP) Merício Juvenál Dos Reis fó hanoin ba governu foun, tenke tau atensaun no servisu boot hodi salva rendimentu doméstika tanba governu tuan ko’alia ona atu garante reforma fiskál no reforma ekonomia maibé sidauk hatene nia prosesu oinsá ona.
“Governu foun ida ne’e tenke halo servisu boot atu salva rendimentu doméstika tanba governu tuan ko’alia ona atu garante reforma fiskál no reforma ekonomia nia maibé ninian prosesu to’o ona iha ne’ebé tenke klaru agora,” Deputadu PLP ne’e levanta iha plenária, Tersa (19/9).
Nia dehan, ita nia fontes prinsipál agora daudaun mak reseita fundu petrolíferu kuaze 90% to’o 95% sustenta orsamentu jerál estadu (OJE). Tanba ne’e, tenke hateke no hanoin dook, labele hanoin de’it ida agora.
“Tuir ha’u nia observasaun US$ 16,5 billoens (fundu petrolíferu) ne’e sei labele aguenta to’o tinan 10 tanba iha tempu agora ita sidauk iha fundus prinsipál seluk atu troka fundus ida ne’e bainhira uza hotu,” nia fó atensaun.
Hodi esplika tan, montante osan US$ 16,5 billoens mai husi mina matan ka posu rua durante ne’e hanesan, Kitan (maran daudaun ona) ho Bayu-Undan maibé tuir kontratu Bayu-Undan sei remata kontratu iha 2022, bele remata antes tinan 2022
Sei tinan 2022 ita problema kontratu ho Bayu-Undan, reseita saida mak atu substitui para ita nia nasaun bele la’o ba oin hodi estadu no governu nia planu bele ezekuta nune’e mós povu nia interese ita bele rezolve, ida ne’e kestaun boot.
Reseita Timor to’o agora seidauk maximal no reseita doméstika sei menus 10%, oinsá atu selu saláriu vensimentu ne’ebé sei uza fundu petrolíferu. Tanba ne’e, nia sujere “Tempu ona ita halo jestaun di’ak, jere setór petrolíferu ho di’ak hodi nune’e orsamentu saláriu vensimentu labele foti fali osan husi fundu petrolíferu.”
Atu garante jestaun di’ak ba fundu petrolíferu ne’e opsaun ida mak dixiplina. Hanesan opsaun tenke foti osan tuir lei fundu petrolíferu haruka, labele repete fali hanesan durante ne’e, lei fundu mina rai hanorin ita atu dixiplina, para labele foti liu husi 3% maibé, durante ne’e ita goza no kontinua.
Bazeia ba esperiénsia indixiplina hodi foti osan fundu mina rai nia husu ba PN atu tau atensaun ba kestaun ne’e tanba nasaun nia fontes prinsipál mak fundu petrolíferu.
“Nune’e hahú agora ita fó atensaun hodi diskute didi’ak problema ida ne’e hodi buka solusaun didi’ak para nasaun nian vida ne’e labele termina iha tinan 10 ka 15 de’it, maski ita mate hotu maibé ita nia bei oan sira tenke kontinua nasaun ne’e. Labele goza agora maibé tenke hanoin jerasaun oin mai,” Mericio Akara bolu atensaun ba nia maluk deputadu iha PN.
(Jornalista: Julia Chatarina)
(Editór : Manuel Pinto)
