DILI (TATOLI)—Xefe Bankada Partidu Libertasaun Popular (PLP) iha Parlamentu Nasionál, Fidelis Magalhães afirma, PLP nia pozisaun klaru, PLP nu’udar opozisaun mai atu fiskaliza governu la’ós hamutuk ho governu atu implementa programa governu nian.
“Orientasaun Partidu nian klaru, la iha autorizasaun. Naran ida rua ba involve iha Governu la’ós orientasaun hosi Partidu. PLP nia pozisaun mak partidu Opozisaun,” Fidelis Magalhães informa ba Jornalista sira iha Parlamentu Nasionál, Segunda (25/09).
Fidelis dehan, signifikadu PLP hili opozisaun, atu fiskaliza programa governu nian, la’ós ba hamutuk fali governu implementa fali ezekutivu nia programa. “Ne’e laloos.”
Nune’e nia dehan, ba tomada posse membru sétimu governu daruak ne’ebé mak sei mai bainhira figura partidu hosi PLP ruma involve, ida ne’e la reprezenta partidu PLP.
“Ema ne’ebé estrutura partidu mai ba junta ho ezekutivu sein iha autorizasaun hodi partidu ne’e la’ós reprezenta partidu,” Fidelis realsa.
no konsidera partidu ida konvida membru hosi partidu ida sein koñesimentu hosi ulun boot partidu ida nian, ida ne’e aktu ne’ebé la edukativu, maibé tenta atu hafahe de’it forsa partidu ida nian.
Entretantu kuadrus polítika PLP José Neves “Sama La Rua” konfirmandu ona ho karta ne’ebé nia submete ba Prezidente Interinu Konsellu Polítiku Nasionál PLP, hodi afirma nia desizaun hodi ba partisipa iha formasaun sétimu governu nu’udar ministru edukasaun.
(Jornalista: Julia Chatarina)
(Editór : Manuel Pinto)
