VATOBOU (TATOLI) – Embaixadora EUA Karen Clark Stanton no Forsa Naval EUA, Batallaun Konstrusaun datoluk ne’ebé koñesidu naran Seabees, ofisiálmente inaugura Postu Saúde Vatobou iha Munisípiu Liquiça iha loron 28 Setembru 2017.
Ho apoiu Ministériu Saúde nian, Seabees konstrui fasilidade saúde ne’e durante fulan tolu no postu saúde ne’e sei benefísiu rezidente liu 5000 iha area ne’ebá.
“Klínika ne’e mak projetu foun liu husi projetu sira seluk ne’ebé Ministériu Saúde no Forsa Naval Estadus Unidus Seabees konstrui hamutuk iha Timor-Leste. Ida ne’e reprezenta mós amizade forte entre ita nia nasaun rua.” Dehan Embaixadora Stanton iha nia diskursu.
Diretora Servisu Saúde Munisípiu Liquiça Apolonia Dos Santos no lider komunidade sira partisipa iha serimónia ne’e. Oradór sira iha serimónia ne’e mak Renato Nunes, Sekretáriu Munisípiu Liquiça, Diretór Nasionál Servisu Saúde Horacio Sarmento, Xefe Suku Vatobou Gabriela no Embaixadora EUA ba Timor-Leste Karen Stanton.
Forsa Naval Estadus Unidus Seabees hela permanente ona iha Timor-Leste hahú kedas husi tinan 2009. Forsa Naval Estadus Unidus Seabees kompleta ona projetu konstrusaun liu 100 iha nasaun ne’e ne’ebé finansia husi Governu Amerikanu no entre projetu hirak ne’e, projetu besik 50 mak projetu ho eskala bo’ot. Projetu hirak ne’e inklui konstrusaun ponte, eskola, postu saúde, reabilitasaun kanalizasaun bee no sentru komunidade sira iha munisípiu hitu iha Timor-Leste.
(***)
