DILI (TATOLI) –Seguransa Parlamentu Nasionál sei halo pasa revista ou check point ba funsionáriu, jornalista no públiku ne’ebé iha interese partisipa diskusaun Governu ho Parlamentu Nasionál iha ámbitu aprezentasaun Programa Governu iha loron, Segunda (16/10).
Porta Vóz Parlamentu Nasionál (PN), Deputada, Lidia Ana Bello informa, desizaun pasa revista ne’e halo bazeia ba desizaun hosi enkontru entre lider bankada parlamentár ho Prezidente PN Aniceto Guterres.
“Parlamentu Nasionál (PN) tenke estabelese regra iha ámbitu diskusaun programa tanba ne’e seguransa sira sei halo passa revista ba funsionáriu parlamentár nian, jornalista no ba audiénsia eh públiku ne’ebé hakarak mai partisipa iha plenária,” Deputada, Lidia Ana Bello informa ba jornalista iha Sala Konferénsia PN, Sesta (13/10).
Check point ne’e nia objetivu ida mak atu asegura ambiente diskusaun programa governu bele la’o ho di’ak. Basa iha diskusaun programa governu kada bankada sei halo apresiasaun ba governu nia programa nu’udar rezultadu analiza ida ne’ebé sira halo hafoin durante loron lima lee tiha programa governu ne’ebé meza parlamentu nasionál distribui ona.
Entretantu deputada ne’e mós enkoraja katak, sei la iha instabilidade iha períodu diskusaun Programa Governu basa autoridade defeza no seguransa to’o agora sira iha kapasidade atu bele asegura estabilidade iha rai laran, maski iha sikun balun hahú mosu problema ki’ik oan sira.
(Jornalista : Zezito Silva).
(Editór : Manuel Pinto)
