DILI (TATOLI)—Primeiru Ministru, Sétimu Governu konstitusionál, Mari Alkatiri, hamutuk ho membru governu ohin, Segunda (16/10) aprezenta programa governu ba tinan lima iha uma fukun hodi hetan aprovasaun hosi Parlamentu Nasionál.
Iha Aprezentasaun programa governu, Primeiru Ministru Mari Alkatiri realsa katak, Objetivu polítiku importante liu ba Governu ne’e mak halo governasaun ba ema hotu, ba Povu, no hatán ba sira-nia mehi boot liu, kona-ba hetan kualidade ba moris di’ak liu, edukasaun di’ak liu, saúde di’ak liu, asesu di’ak liu ba enerjia no bee moos, hahán ho kualidade liu, hela-fatin ho dignidade, no nune’e hatán ba determinasaun konstitusionál sira.
VII Governu Konstitusionál foti kompromisu atu: kombate izolamentu husi populasaun, kria infraestrutura hirak ho kualidade, dinamiza prestasaun ba servisu públiku sira, fó atensaun espesiál ba medida asaun sosiál sira no prestasaun ba kuidadu saúde nian, servisu ba dezenvolvimentu husi ekonomia ida ho kualidade ne’ebé bele hamosu retornu pozitivu sira ne’ebé evidente hodi hasa’e kondisaun moris ba timoroan hotu.
Enkuantu Objetivu sira ba governasaun durante tinan lima oinmai : setór Sosial, kompostu hosi, Asesu ba ensinu ho kualidade ba ema hotu, Asesu ba servisu saúde nian ho kualidade ba ema hotu, Apoiu ba ema vulneravel sira, Dezenvolvimentu sustentável ba jerasaun hotu, Indústria kriativa ne’ebé ativa liu no promosaun kultura nasionál, Foin-sa’e sira ho saúde, instrusaun no ho valór étiku sira.
Dezenvolvimentu infraestrutura mak : Hasa’e kapasidade produtiva no hasa’e PIB potensiál, Hadi’a ema sira nia asesu ba servisu sira, Hasa’e sustentabilidade husi infraestrutura sira.
Dezenvolvimentu setór ekonómiku mak : Hasa’e produsaun agríkola, Dezenvolve indústria husi rekursu naturál sira, Hasa’e rendimentu liuhusi kriasaun ba empregu, Ambiente ne’ebé favoravel ba diversifikasaun ekonómika.
Modernizasaun institusionál mak; Garantia ba defeza, seguransa no estabilidade nasionál, Garantia ba sistema justisa ida ne’ebé asesivel no efetivu, Timor-Leste nia integrasaun no pozisaun globál, Haforsa kultura demokrátika liuhusi responsabilizasaun no transparénsia, Jestaun ba setór públiku ho efikásia, efisiénsia no responsabilidade.
Governu mós promete katak, sei atu implementa mekanizmu sira hodi estimula parseria públiku-privada sira, ho aposta moos iha parseria intersetoriál sira no ba kooperasaun, hodi viabiliza kompartisipasaun husi setór mak fundamentál ba saúde.
Iha ambitu área sosiál, Governu sei implementa Programa Nasionál Apoiu ba Ekonomia Sosiál no Solidária hodi promove koezaun sosiál no kriasaun ba empregu. Nune’e, sei presiza moderniza mekanizmu hirak ho administrasaun simplifikada hanesan “Kooperativa ho Oras” – rede ba ekonomia sosiál no promosaun atu hamosu organizasaun no inisiativa sosiál foun. Ami sei apoia valorizasaun no kapasitasaun ba empreendedór sosiál no promotór ba projetu, ho objetivu atu kria solusaun hirak foun ba problema sosiál ne’ebé identifika tiha ona, hodi nune’e dezenvolve ekonomia sosiál husi merkadu.
Kona-bá Foin-sa’e sira mós sai prioridade ida iha dezenvolvimentu sósiu-ekonómiku rain nian, no nune’e, ho parseria hamutuk Konsellu Nasionál ba Dezenvolvimentu Juventude, Governu ne’e atu kria medida hirak ne’ebé bele duni promove koordenasaun entre entidade públika no privada oioin, ne’ebé garante promosaun husi asaun edukativa téknika-profisionál makbele dezenvolve inisiativa atu hetan asesu ba merkadu servisu nian iha área ortikultura, pekuária, akikultura, mekánika, elektromekánika, karpintaria, no atividade servisu sira seluk, hodi bele promove autonomia pesoál no profisionál ba foin-sa’e sira no kondisaun sira ne’ebé permite harii projetu ba moris ho integrasaun sosiál no profisionál.
Nu’udar konkluzaun, Atividade husi Governu sei iha fleksibilidade hodi bele halo adaptasaun no hatama medida sira ne’ebé presiza hola tanba emerjénsia ka evolusaun normál husi atividade ekonómika no sosiál iha país no iha mundu; atividade husi Governu sei iha fleksibilidade natoon hodi halo adaptasaun no hatama medida sira ne’ebé propoin husi partidu seluk ne’ebé tuur iha Parlamentu Nasionál ne’ebé tuir Filozofia no prinsípiu sira ne’ebé koligasaun Governu ida ne’e hola kompromisu ho Povu.
Antes ne’e, Primeiru-ministru, Mari Alkatiri bolu mós atensaun ba membru governu sira katak, povu Timor-Leste husu sira-nia direitu, kualidade moris ne’ebé digna liu. Nune’e atu responde povu nia hakarak, nu’udar xefe do governu hakarak husu, forsa tomak hodi hamutuk garante pás no estabilidade, kondisaun “sine qua non” ba susesu kualkér programa dezenvolvimentu.
Basa, Alkatiri observa, povu kontinua sai vítima ba moris husi ekonomia subsisténsia no importasaun nó mós provoka asimétrika entre zona urbana no zona rurál ne’ebé labele simu.
“Ita tenke buka dalan hodi sai husi marazmu (paralizadu-red) ida ne’e, mobiliza ita hotu nia kapasidade hodi hatán nesesidade sira ne’e, liuliu ba maubere no buibere sira hotu,” Alkatiri enkoraja.
(Ekipa Redasaun)
