DILI (TATOLI)—Peskizadór ba “Opsaun Enerjia Verde ba Timor Leste (Green energy options for Timor Leste),” Paulo da Silva, M.Eng observa katak, Dezenvolvimentu setór eletrisidade iha Timor-Leste presiza konsensu ida entre komponente hotu-hotu, ida nee atu asegura kontinuidade iha futuru maski governu troka.
“Presiza iha definisaun sombriña polítika ida (big picture policy) ba setór indústria eletrisidade ne’ebé bele sai hanesan konsensu ida entre komponente hotu-hotu, ida nee atu asegura kontinuidade iha futuru maski governu troka malu,” Kandidatu Doutoramentu iha: Nagaoka University of Technology (NUT), ho Tópiku Pesquisa: “Opsaun Enerjia Verde ba Timor Leste (Green energy options for Timor Leste),” informa ba TATOLI via email, ohin.
Tuir Paulo nia haree ba programa sétimu Governu Konstitusionál nian ne’ebé liga ba iha setór enerjia eletrisidade ne’ebé iha paragraph ida, esplika governu atu reorganiza serbisu iha setór eletrisidade. Signifika, karik sei halo ajustamentu ruma iha instituisaun EDTL hodi asegura funsionamentu serbisu fornesimentu enerjia eletrisidade, inklui revizaun ba tarifas ne’ebé konsidera ladún reflete ba kapasidade kompra konsumidora sira nian liu-liu iha nivel doméstiku.
Vontade governu nian ida ne’e, Paulo dehan, pozitivu, tanba hanesan parte ida husi dimensaun governance elétrika (electrical governance component). Iha programa nee, governu indika katak atu halo “estrutura fali EDTL” hodi masimiza prestasaun EDTL nian no atrai setór privadu. Maski nune’e ladún klaru, tanba fatór xave ba investor sira hodi investe iha setór enerjia eletrisidade la’ós de’it iha re-reestruturasaun nee, maibé iha kondisaun importante seluk ne’ebé tau iha konsiderasaun mos.
Primeiru seguransa ba investimentu (leis) nee importante tebes atu asegura sira nia asset no capital investimentu, hodi define sira nia papél (role) no nivel intervensaun. Segundo, Merkadu (konsumidora) nia abilidade ba kompra ou sosa enerjia (enerjia demand) presiza fó lampu verde ba investor tanba sira buka lukru/manan (profit oriented), signifika tenke iha atividade ekonómika barak ne’ebé presiza uza enerjia ne’ebé boot.
Terseiru ita presiza fornese informasaun (dadus tékniku) ne’ebé klaru kona ba opsaun enerjia/fontes enerjia ne’ebé applicable no bele esplora hodi prodúz ba enerjia, ida nee ita seidauk iha inventarizasaun ida klaru no loloos kona ba profile fontes enerjia ne’ebé ita nia nasaun iha. Ho nune evita investimentu additional ba estudu tékniku husi investor sira. Iha parte seluk, fatór additional ne’ebé importante mós, estabilidade polítika.
“Fatór hirak ne’e hanesan barómetru ida ba setór privadu nian desizaun atu investe ou lae. Ita hare katak, ho governu minoria dala ruma sai preokupasaun ba sira atu toma inisiativa tanba klima polítika ne’ebé sei frajil hela,” nia haree.
Hodi kontinua observa katak, Programa ne’ebé indika iha ne’e konsentra liu ba natural gas maibé la fó espesífiku kona ba opsaun enerjia alternativa ne’ebé apropriadu liu no applicable ba Timor Leste bazeia ba dadus tékniku hodi substitui fontes conventional ne’ebé daudaun nee hatodan mákina do estadu.
Iha estudu lubuk ida, ne’ebé indika katak fontes hydro elétriku no enerjia solar sai opsaun mais relevante ba Timor Leste. Dala ruma, ita presiza esplora di’ak liu tan kona ba rezultadu husi estudu hirak nee no tau iha konsiderasaun opsaun ida ne’ebé reflete ba ita nia polítika enerjia eletrisidade.
Polítika ida ne’ebé di’ak, presiza iha definisaun sombriña polítika ida (big picture policy) ba setór indústria eletrisidade ne’ebé bele sai hanesan consensus ida entre komponente hotu-hotu, ida nee atu asegura kontinuidade iha futuru maski governu troka.
Iha parte seluk, susar atu kompriende tanba iha estrutura governu da hitu nian, laiha portfolio ida espesífiku ba area enerjia eletrisidade. Maski iha vice ministru habitasaun no ambiente, maibé lahatene tarefa ou knar serbisu inklui tau matan ba setór nee ou lae. See kabe duni ba portfolio ida nee, maka susar atu halo mudansa tanba ninia kualifikasaun la’ós iha area eletrisidade.
Ho nune’e nu’udar akadémiku, Paulo konsidera, programa governu da hitu nian ba setór enerjia eletrisidade no liga ba kondisaun setór nee rasik, ba oin Timor Leste presiza hamosu polítika sombriña ba programas no atividade ba setór nee rasik hanesan; Hamosu polítika foun ne’ebé ho karakter enerjia autosuficiente, sustentável no soberanu ba ita nia dezenvolvimentu ekonómika no social ba tempu naruk.
Reforma setór indústria eletrisidade (liu-liu segment produsaun) atu reflete kondisaun real ekonómika (finanseiru), social no ambientál nasaun nian, hodi hatún estadu nia despeza annual. Maibé bele fó reseita no kria serbisu ba ita nia emar sira.
Tenke hamosu polítika ida klaru no aseitavel husi komponente hotu atu bele halo substituisaun ba enerjia conventional ne’ebé ita iha. Polítika nee tenke ho karakter multidimensional hodi bele ajuda mós setór sira seluk nia dezenvolvimentu.
Hadi’a setór governance (electrical governance): hari no define klaru autoridade regulador ninia kompeténsia sira iha leis, Gastão, planu, no seguransa social ba professional EDTL nian no meius protesaun ba konsumidora. Investe makas liu tan iha rekursu umanu iha area espesialidade sira ne’ebé liga diretamente ba iha indústria eletrisidade nian.
Entretantu, Entre tinan 1999 to 2005, finansiamentu EDTL nia funsionamentu depende (rely) ba iha ajénsia dezenvolvimentu internasionál sira nia apoiu. Pelumenus liu $120 millions husi apoiu nee utiliza ba restaurasaun sentru produsaun elétrika sira. Depois, Timor leste hahú hetan reseitas husi oleo no gas, governu investe liu $2 billions iha setór eletrisidade (Hari ‘sentru produsaun elétriku Hera, Betanu no Oekusi, inklui infraestrutura ba liña tranzmisaun no distribuisaun sira).
Tinan-tinan governu aloka osan millions hodi sosa kombustivel (diesel) no oleo ba sentru hirak nee. Ezemplu, iha 2016, governu aloka $52.24 millions ba sentru produsaun Hera hodi sosa diesel. Iha 2017, governu prevee tan $68 millions ba Hera, $28 millions ba Betanu, ida nee seidauk inklui sentru produsaun iha Oekusi no Atauru. Kustu seluk ne’ebé uza mos subsídiu husi governu maka kustu ba manutensaun infraestrutura sira hanesan linha tranzmisaun, distribuisaun no subtrasaun sira inklui manutensaun periódika ba geradores sira iha sentru hotu. Iha sorin seluk, laiha balansu entre reseita no despeza husi setór nee, tanba osan ne’ebé EDTL koleta husi Venda enerjia tinan-tinan menus husi $25 millions.
Daudaun nee Timor Leste adapta tarefa ida bolu “flat rate”. Modelu tarefa nee klasifika ba nivel tolu, tipu konsumidora ki’ik, klasifikasaun enerjia 000-1000, tarefa/kWh USD $.0.15. konsumidór Médiu, klasifikasaun enerjia, 1000-3600, tarefa/kWh USD $.0.20. konsumidór boot, klasifikasaun enerjia, >3600, tarefa/kWh USD $.0.24. Tarefa eletrisidade ida nee sai obstákulu tanba ladún reflete kapasidade sosa/kompra (purchasing ability) kada nivel konsumidora ho rendimentu ekonómiku ne’ebé lahanesan. Liu- liu família kiak no ki’ik sira ne’ebé ninia rendimentu menus husi $0.75/loron. Entaun presiza toma atensaun atu kria tarefa ida ne’ebé reflete ba iha kapasidade ekonómika konsumidora sira nian, liu-liu nivel doméstika.
(Ekipa Redasaun)
