DILI (TATOLI)—Sétimu governu ne’ebé forma hosi koligasaun Partidu Fretilín ho Partidu Demokratiku (PD) sei kontinua utiliza reseita hosi fundu pertoliferu ho sustentabilidade, atu finansia investimentu produtivu ba infraestrutura fízika sira.
Bazeia komumentu ba programa sétimu governu versaun tetun, pajina, 20, konsidera infraestrutura no setór ekonómiku prioritáriu sira, ne’ebé permite retornu ekonómiku ne’ebé konsistente liu, tanba bele aumenta dalan asesuho konstrusaun ba estrada sira ka ho utilizasaun husi transporte marítimu no aéreu sira, no presiza mós harii infraestrutura sira ne’ebé bele ajuda aumenta área produsaun oioin.
Hamutuk ho ida-ne’e, Governu ne’e mós atu promove hasa’e sistema jestaun ba investimentu públiku sira, no mós hasa’e kualidade ba infraestrutura sira ne’ebé harii tiha ona, liuhusi haforsa konkorénsia iha ekonomia ho prosesu akizisaun públika ne’ebé kompetitivu liu.
Aleinde fó atensaun maka’as ba investimentu sira iha área moris seluk tan rain nian, Governu ne’e mós atu promove infraestrutura ekonómika moderna no estrajéjika, ne’ebé atu harii ho kualidade, ho relasaun kustu-benefísiu apár ho kontestu dezenvolvimentu no rezultadu efetivu, hodi bele suporta no apoia movimentasaun lojístika lalais no efisiente ba ema no bein hirak tuir kuadru investimentu privadu nian.
Nune’e, Governu ho konxiénsia kona-ba importánsia atu hasa’e kualidade husi despeza públika sira ba infraestrutura no husi prosesu desizóriu, sei fó prioridade ba dezenvolvimentu husi infraestrutura estratéjika hirak ne’ebé apár ho prioridade sira ba diversiifikasaun ekonómika, sei halo revizaun no reforma ba sistema jestaun husi investimentu públiku sira, hodi haforsa kapasidade avaliasaun ba projetu potensiál iha Sekretariadu ba Projetu Boot no mós iha Ministériu relevante sira ho responsabilidade ba dezenvolvimentu husi infraestrutura sira; sei haforsa koordenasaun entre projetu sira atu harii estrada rurál no planu dezenvolvimentu sektoriál ba Kafé no Turizmu; no sei hasa’e finansiamentu ba manutensaun husi ativu sira ba infraestrutura ne’ebé iha tiha ona no sei atu harii.
Governu sei implementa projetu sira ba dezenvolvimentu husi “Rede Rodoviária” rain nian ne’ebé iha daudaun, hanesan halo konstrusaun, reabilitasaun no manutensaun ba estrada; konstruasaun fali husi estrada nasionál no munisipál, tuir padraun internasionál sira; konstrusaun husi infraestrutura rodoviária ne’ebé nesesáriu atu apoia dezenvolvimentu ba Kosta Súl, kontinua harii infraestrutura ba estrada sira iha RAEOA, ba rede abastesimentu nian, ba rede eskolár, ba ponte no Sentru Saúde nian, ba infraestrutura agríkola sira, nst. Governu ne’e sei fó prioridade ba dezenvolvimentu husi estrada rurál sira atu tama no loke asesu ba lokalidade sira, ho perspetiva abordajen kona-ba “Estrada ba Dezenvolvimentu”, ne’ebé la’o tiha ona, no tuir rekomendasaun sirahusi Planu Diretór ba Estrada Rurál.
Governu sei promove asesu ba bee ne’ebé sufisiente, seguru, aseitável, ho asesu fíziku no ho folin razoável ba konsumu pesoál no doméstiku”, ba Timoroan hotu.
Governu mós sei promove dezenvolvimentu husi empreza sira iha setór Bee no Saneamentu nian, harii Empreza Munisipál no Inter-Munisipál ba Bee no Saneamentu no atrai setór privadu atu halo Parseria Públiku-Privada sira (PPP) no jestaun ba konsesaun sira; atu kria kondisaun hirak atu implementa regulasaun téknika no ekonómika efetiva ba setór bee no saneamentu no dezenvolvimentu husi sustentabilidade no autonomia institusionál ba setór ne’e.
Governu sei promove konstrusaun husi barrajen retensaun bee superfisiál ba irigasaun no protesaun husi sentru urbanu ho situasaun krítika; atu identifika fonte bee foun, ne’ebé inklui dessalinizasaun, konstrusaun husi rezervatóriu hirak, instalasaun husi sistema tratamentu bee nian iha fatin balun rain nian.
Governu mós sei aprova lejislasaun apropriada hodi organiza fali setór elétriku no atu implementa ninia planu; sei aprova no implementa Polítika Tarifária ida ne’ebé inklui tarifa la hanesan tuir tipu konsumidór oioin, hanesan kliente partikulár, komersiál no industriál sira; sei hala’o estudu sira atu estrutura fali EDTL – Eletricidade de Timor-Leste, hodi hasa’e ninia efisiénsia operasionál no ekonómika; atu atrai setór privadu ba setór enerjia rain nian; sei hala’o estudu hirak kona-ba viabilidade atu hatama solusaun balun kona-ba enerjia alternativa; no sei inklui fonte kombustível foun ba produsaun husi enerjia elétrika, hanesan gás naturál.
Governu sei enkomenda prepara, no hafoin sei aprova, Planu Diretór ba Aeroporto Internasionál “Presidente Nicolau Lobato” iha Díli no ba Aeroportu Internasionál iha Baucau (ida-ne’e ba Forsa Aérea no ba Turizmu), ne’ebé inklui reabilitasaun ba sira-nia pista no habelar fatin (ba aeroportu Díli nian); no mós estudu viabilidade kona-ba aeródromu munisipál sira, tuir koordenasaun ho Planu Diretór ba aeroportu internasionál sira. Governu ne’e atu haforsa kapasidade husi Autoridade Aviasaun Sivil Timor-Leste nian (AACTL) hodi garante regulasaun efetiva ba setór transporte aéreu, no mós atu haforsa kapasidade husi Administrasaun ba Aeroportu no Navegasaun Aérea Timor-Leste nian (ANATL) nu’udar operadór ba aeroportu sira iha Timor-Leste, ne’ebé inklui opsaun hirak atu haforsa ninia kapasidade liuhusi mekanizmu inovadór ba kontratasaun no inovasaun. Iha área ida-ne’e, Governu mós sei respeita nafatin RAEOA/ZEESM nia autonomia administrativa, patrimoniál no finanseira.
Governu sei fasilita no apoia implementasaun ba Parseria Públika/Privada (PPP) iha konstrusaun ba Portu Tibar nian, nu’udar alternativa ba Portu Díli nian; sei moderniza Portu Díli nian no ninia konversaun hanesan Marina ba Sidade no Portu ba Kruzeiru sira; sei garante konstrusaun husi Portu no Baze Fornesimentu ba Suai, aleinde Portu balun ba Peska iha Laga no Lautém, Portu Kairabela nian, iha subdistritu Vemasse, ida-ne’e atu fasilita asesuba tasi iha Munisípiu Baucau no atu apoia turizmu. Governu ne’e mós atu promove estudu hirak atu harii portu Manatuto nian no atu kria liña marítima nasionál ida, hodi bele fasilita transporte ba kabotajen no ligasaun kosteira, no atu fornese servisu sira kona-ba transporte marítimu ba ema no bein, entre fatin litorál oioin Timor-Leste nian. Nafatin ho respeitu ba RAEOA nia autonomia, Governu ne’e mós atu koopera ho Autoridade atu dezenvolve portu komersiál RAEOA nian halo boot liután..
Governu mós atu haforsa Autoridade Nasionál Komunikasaun (ANC) iha parte institusionál, ne’ebé inklui halo revizaun no moderniza ninia kuadru normativu; atu intensifika diálogu ho operadór privadu ba telekomunikasaun no nune’e garante investimentu iha ligasaun ba kabu ho fibra óptika; no promove disseminasaun husi asesu ba Internet.
(Ekipa Redasaun)
