DILI (TATOLI)—Xefe Bankada Partidu Libertasaun Popular-PLP, Fidelis Magalhães ho Deputadu CNRT, Aderito Hugo da Costa afirma, la iha dalan atu deputadu sira hosi partidu rua ne’e submete proposta ba governu iha ámbitu diskusaun programa governu nian, tuir saida mak Primeiru Ministu, Mari Alkatiri husu.
“Ami so bele fó de’it ami nia opiniaun no apresiasaun la’ós ba ajuda fali governu, ideal ne’e, governu lori programa mai governu hatene ona nia hakarak saida los, la’ós ami mak submete fali programa,” Fidelis Magalhães informa ba Tatoli iha Plenária Parlamentu Nasionál, Kuarta, ohin.
“Improviza de’it ita nian hanoin, la iha korrespondénsia atu fó proposta no kontra proposta, iha mak, vota avabor no kontra, ida ne’e mak ita la’o tuir korredór Konstituisaun Repúblika Demokrátiku Timor-Leste (KRDTL),” eis Prezidente Parlamentu Nasionál Aderito Hugo reforsa tan.
Tuir deputadu Nain rua ne’e, CNRT ho PLP kompromete ona atu sai opozisaun edukativu no konstrutivu, tanba ne’e, iha Parlamentu Nasionál partidu rua ne’e sei la fó dalan ba kualkér aktu ne’ebé tenta dezvia regras normal ne’ebé haktuir ona iha konstituisaun kona-bá lalauk aprezentasaun programa governu nian ba tinan lima.
Maski Primeiru Ministru Sétimu governu konstitusionál, Mari Alkatiri husu atu deputadu sira submete proposta hodi ajuda hadi’a programa ne’ebé governu prepara ona.
“Ha’u hein proposta hosi Senor Deputadu sira, ohin to’o aban, ha’u hein. Ha’u sei la hein atu to’o fulan ida, hodi fila mai Parlamentu nasionál,” PM Mari Alkatiri bolu atensaun iha plenária, ohin.
Hatán ba pedidu hosi Primeiru Minsitru, deputadu Aderito Hugo, esplika katak, ida ne’e mak buat hanaran “kontráriu,” hanorin fali públiku atu interpreta sala natureza aprezentasaun programa ne’ebé haktuir iha konstituisaun.
Konstituisaun hatete, katak, governu aprezenta de’it nia programa tinan lima nian atu hetan apresiasaun hosi Parlamentu, la iha espasu atu aprezenta proposta ou kontra proposta.
”Ha’u observa saida mak Primeiru Ministru nia hakarak ne’e atu fó hatene ba públiku katak medida debate programa hanesan mós debate orsamentu jerál estadu ou proposta lei ruma.”
Iha rejimentu, no konstituisaun la fó dala atu aprezenta proposta, deputadu sira só bele halo de’it apresiasaun, taka ona, iha de’it, dalan rua bainhira taka mak, bankada governu nian hamosu mosaun de konfiansa, ou opozisaun aprezenta mosaun rejeisaun (kontra).
Nune’e nia husu ba lider sira, atu aproveita oportunidade debate polítika iha Parlamentu fó informasaun los, la’ós hakle’uk informasaun.
Aleinde de ida ne’e, aproveita oportunidade hodi fó sai mós ba públiku katak, CNRT sei la garantia programa governu pasa ga lae tanba governu actual minoritáriu iha parlamentu se ita kompara fali ho governu sira uluk nian.
“Opozisaun sei la fasil atu apoiu tanba responsabilidade ba nia kompromisu polítika ne’ebé fó sai ona ba nia eleitoradu sira iha períodu kampaíña nian.”
“Asaun sira ne’e opozisaun halo tanba reflete ba kompromisu edukativa no konstrutiva hodi la aseita kualkér asaun ne’ebé tenta atu viola regra iha konstituisaun no lei sira.”
“Konstrutivu ne’e mak, durante debate ami nia bankada, deputadu hotu-hotu halo apresiasaun. Edukativu mak dehan ita tenke la’o tuir giaun no regras konstitusionál.”
Hanoin hanesan mai hosi xefe bankada PLP, Fidelis Magalhães, hodi dehan, tuir konstituisaun repúblika Demokrátiku Timor-Leste haktuir katak, governu lori programa ba Parlamentu Nasionál ne’e atu hetan apresiasaun, papél parlamentu nian, la’ós apoiu governu iha preparasaun ba nia programa.
Lei no konstituisaun dehan, programa ne’ebé lori mai feitu tiha ona, mai so para apresiasaun de’it. Iha ne’ebá la dehan, parlamentu iha knaar atu ajuda governu iha preparasaun ba programa.
Tanba ne’e, PLP sei la hatama proposta ruma ba programa governu tanba konstituisaun la fó dalan atu PLP iha Parlamentu Nasionál submete proposta.
Maibé husu atu governu kumpre konstituisaun nune’e iha primeiru aprezentasaun programa mak la pasa, sei iha tan oportunidade dala ida tan atu governu fila hikas mai Parlamentu hodi aprezenta nia programa tan.
“Sé Primeiru Ministru dehan, programa primeiru nian la liu no la fila ba Parlamentu ne’e desizaun Primeiru Ministru nian.” Fidelis realsa.
Hodi kontinua esplika katak, relasaun PLP ho CNRT ne’ebé hamutuk ona iha plataforma koligasaun Aliansa Maioria Parlamentár, tanba prinsípiu edukativu no konstrutivu.
“Uluk ami kritika programa mega projetu ne’ebé aprezenta hosi CNRT ne’e la’ós dehan ami anti mega projetu total, maibé ami hakarak iha rasionalizasaun ba rekursu ne’ebé di’ak para bele apoiu no foku ba programa sira seluk.”
“Imajina Timor-Leste nia osan agora iha de’it USD $16, 5 ital Billoens, sé governu mai kontinua halo tan mega projetu modelu Zona Espesiál Ekonomia Sosiál Merkadu (ZEEMS) hat, kontinua halo tan projetu boot sira. Ne’e oinsá, bainhira ita ko’alia kona-bá redús défisit, maibé governu rasik kria polítika fiskál ida ne’ebé expansionista,” Fidelis konklui.
(Jornalista : Julia Chatarina)
(Editór : Manuel Pinto)
