DILI (TATOLI)—Komisaun Polítika-FRETILIN (Frente Revolusionáriu de Timor-Leste Independente)-KP-FRETILIN, Postu Administrativu Cristo Rei, Dili, bolu atensaun ba partidu CNRT (Conselho Nacional da Reconstrução Timor-Leste), PLP (Partido Libertação Popular) no KHUNTO (Kmanek Haburas Unidade Timor Oan) atu koopera ho governu da-hitu, tan konsidera programa governu reflete duni povu nia moris.
“Postu administrativu Cristo Rei fó apoiu ba programa VII governu konstitusionál tan reflete duni povu nia nesesidade bázika hanesan koezaun sosiál, dezenvolvimentu infraestrutura, dezenvolvimentu ekonómiku no moderniza institusionál,” portavós Komisaun Polítika FRETILIN Cristo Rei, Agostu Pereira, bolu atensaun liuhosi konferénsia imprensa, Kuarta, Ohin.
Portavós ne’e afirma katak, komisaun polítika partidu FRETILIN ho nia estrutura baze, OPMT (Organização Popular Mulher de Timor), JF (Juventude FRETILIN), organizasaun filiada ne’ebé iha aldeia 51, suku walu ho militante FRETILIN ne’ebé rejistradu iha baze dadus hamutuk na’in 11.368, pronto kualkér tempu atu realiza eleisaun antisipada bainhira governu konstitusionál da-hitu monu.
Entretantu komisaun polítika FRETILIN ho nia estrutura tomak, militante no simpatizante la konkorda bainhira governu konstitusionál da-hitu monu entrega fali ba Aliansa Maioria Parlamentár 2, (CNRT, PLP, KHUNTO) atu forma fali governu, tanba tuir sira la bele entrega de’it maibé atu entrega dalan ikus mak eleisaun antisipada nune’e povu mak sei deside se mak ukun hikas.
Ba deputadu sira iha parlamentu nasionál, KP-Fretilín, husu atu ezerse funsaun ho di’ak tanba povu durante ne’e moris hamutuk iha pás no estabilidade nia laran hahú kedas kampaña to’o publikasaun rezultadu la iha buat ruma mezmu mai husi partidu 21 ema.
Maibé, hotu-hotu simu rezultadu ho di’ak no nia rezultadu oi tuan ka barak entrega ona ba distintu deputadu iha PN atu ezerse.
Portavós Komisaun Polítika FRETILIN Cristo Rei, Agostu Pereira lamenta ba deputadu sira nia apresiasaun ba programa, liu-liu deputadu partidu CNRT, PLP no KHUNTO ne’ebé konsidera katak, programa governu da-hitu inkonsisténsia, inkoerénsia no la sistemátiku.
“Husu ba militante no simpatizante partidu FRETILIN mantein pás no estabilidade iha ida-idak nia hela fatin no labele monu ba provokasaun oi-oin ne’ebé sei mosu.” Agostu husu.
(Jornalista: Rafy Belo)
(Editór : Manuel Pinto)
