DILI (TATOLI)—Prezidente Partidu Libertasaun Popular-PLP, Taur Matan Ruak, lori estrutura PLP ho KHUNTO tomak nia naran hato’o parabéns ba Prezidente CNRT, Kay Rala Xanana Gusmão, ba nia desizaun hodi lidera hikas partidu CNRT hafoin Xanana demite an hosi kargu iha kongresu estraordináriu CNRT nian, bainhira rona tiha rezultadu eleisaun lejizlativa 2017 nian.
“Parabéns ba maun Xanana ba nia determinasaun atu lidera fali partidu CNRT. Lori PLP nia naran, ha’u hato’o saudações espesiál ba Xanana Gusmão. Husu ita boot sira tranzmite ba nia (Xanana-red),” Taur Matan Ruak afirma iha nia diskursu ba militante, estrutura, partidu CNRT, PLP, KHUNTO, iha Segundu konferénsia Nasionál, Partidu CNRT, ne’ebé realiza iha sede nasionál CNRT, Bairru dos Grilos, Domingu, (05/11).
Nu’udar kompatriota ba Xanana Gusmão iha prosesu luta hasoru inimigu hodi defende ukun rasik an, Taur sente kontente tanba dala ida tan Xanana Gusmão revoga nia desizaun ne’ebé Xanana rasik halo hodi suspende nia kargu nu’udar Prezidente ba partidu CNRT pos de eleisaun lejizlativa 2017 nian.
“Ha’u kontente tanba atu enfrenta situasaun difisil hanesan ohin loron, Ita presiza lideransa ida ne’ebé forte, visionary hodi fó esperansa ba povu katak, la iha buat ida ne’ebé que difisil liu iha mundu bainhira ita hakarak atu la’o ba ne’ebé de’it,” Taur haktuir.
Nu’udar lider ba partidu PLP, Taur promete katak, nia (Taur-red) ho konselleiru Partidu KHUNTO, Naimori sei fó apoiu tomak ba CNRT ho Xanana Gusmão hodi kontinua konsertasaun polítika ne’ebé CNRT, PLP, KHUNTO hatudu ona iha Parlamentu Nasionál liuhosi sombriña Opozisaun Aliansa Maioria Parlamentár.
“Ohin ha’u fiar ona imi, imi bele halo buat hotu-hotu menus viola konstituisaun. Ita nia komportamentu polítika tuir konstituisaun. Ita tenke garante ba Prezidente da Repúblika katak, ita prontu garante estabilidade governativa ba tinan lima oin mai, hodi kontinua buat ne’ebé governu agora la bele halo tan minoria,” Taur apela.
Dala ida tan “Ha’u fó parabéns ba deputadu sira hosi CNRT, PLP, KHUNTO iha Parlamentu Nasionál.”
Taur mós fó hanoin katak, di’ak liu ba situasaun ohin loron nian, eleisaun antisipada la’ós alternativa tanba ne’e bainhira programa governu nian la pasa tan ba dala rua, Prezidente Repúblika bele konvida Aliansa Maioria Parlamentár nu’udar alternativa ida hodi garante estabilidade governasaun.
“Imi tranzmite ba nia Xanana, ami rua Naimori mai hamutuk ho Xanana. Tranzmite mós ba povu katak, Taur Matan Ruak ho Xanana Gusmão dala ida tan hamutuk. Ami la aseita ema viola konstituisaun, tanba ne’e, enkuantu imi nia hahalok halo tuir konstituisaun la iha ida mak akuza ita, ita la sala, ita halo esforsu atu garante ba Prezidente da Repúblika katak, Senor Prezidente iha alternativa,” Taur Matan Ruak deklara.
Antes ne’e mós, Konferénsia Nasionál Partidu Kongresu Nasionál Rekonstrusaun Timor-Leste (CNRT) iha loron da-ikus, Domingu (06/08) hasai ona rezolusaun ida hodi suspende demisaun Prezidente Partidu Kay Rala Xanana Gusmão hosi nia kargu no husu atu Xanana kontinua ezerse funsaun nu’udar Prezidente ba Partidu CNRT.
Konteúdu hosi rezolusaun ne’e suspende pedidu demisaun Kay Rala Xanana Gusmão nu’udar Prezidente Partidu CNRT, no autoriza Kay Rala Xanana Gusmao, atu kontinua ezerse funsaun nu’udar Prezidente Partidu CNRT “sem Plenos Poderes” to’o kongresu tuir mai.
Rezolusaun no 2 ne’ebé hasai husi konferénsia nasionál partidu CNRT no husu ba Xanana Gusmão atu dada hikas ninia liafuan ne’ebé hatete “Demite An” hosi kargu Prezidente ba Partidu CNRT ne’ebé fó sai iha loron dahuluk konferénsia nian.
Maibé Xanana Gusmao hatan, katak, nia sei la dada liafuan ne’ebé nia hasai atu “demite” husi ninia Knaar nu’udar Prezidente Partidu, maibé se desizaun hotu-hotu iha partidu nia liman.
“Atu dada ha’u nia liafuan, Ha’u sei la dada, maibé partidu nia desizaun ha’u simu,” Xanana hato’o hodi justifika nia fiel ba CNRT.
Entretantu rezultadu konferénsia CNRT durante loron tolu hasai rezolusaun hamutuk tolu, rezolusaun ida CNRT sai nu’udar opozisaun iha formasaun VII governu, rezolusaun daruak, suspende pedidu Prezidente Partidu ninia demisaun, no rezolusaun datoluk, auditoria ba programa no finanseiru partidu CNRT.
Ho konferénsia nasionál partidu CNRT ne’ebé ohin realiza revoga ona rezolusaun ida ne’ebé hatete, CNRT sai nu’udar opozisaun iha formasaun VII governu, no rezolusaun daruak, suspende pedidu Prezidente Partidu ninia demisaun.
(Jornalista : Zezito Silva)
(Editór : Manuel Pinto)
