DILI (TATOLI)—Primeiru Ministru Sétimu Governu konstitusionál, Mari Alkatiri afirma katak, nia sei simu kualkér desizaun ne’ebé mak Prezidente da Repúblika foti hosi rezultadu dialog ne’ebé halo ho Prezidente ohin, bainhira desizaun ne’e la kontra konstituisaun.
“Ha’u lakohi interfere Prezidente Repúblika nia kompeténsia. Se Prezidente deside tuir konstituisaun ha’u tenke simu,” Primeiru Ministru Mari Alkatiri afirma ba Jornalista sira hafoin halo dialog ho Prezidente da Repúblika, Francisco Guterres Lú Olo iha Palásiu Prezidente Repúblika, Bairru Pité, ohin.
Alkatiri dehan, iha Timor-Leste ne’e, sosiedade mak importante, la’ós polítika sira mak importante. Ho nune’e dialog ne’ebé mak iha atu buka estabilidade nasionál la’ós estabilidade governativa de’it.
Basa governu maioria mak ka’er governu mós sei la garantia estabilidade. Realidade iha Primeiru Governu konstitusionál hetan maioria kualifikada se kompara ho maioria ida agora 35 kadeira deputadu de’it mosu instabilidade .
Tanba ne’e dialog ne’ebé mak Nia (Alkatiri) halo ho Prezidente da Repúblika la diskute senáriu ruma aleinde de modalidade governasaun hanesan, koligasaun, insidénsia parlamentár, no inkluzaun, tanba sei hein nafatin Prezidente Partidu CNRT, Kay Rala Xanana Gusmão.
“Ita Hein ho Bom Senso para ita halo senáriu se lae ita halo fali teatru no la hetan senáriu ruma ba governasaun,” Primeiru Ministru realsa.
Hodi lamenta katak haree ba situasaun polítika ohin loron nia sá kultura polítika mak sira (jerasaun tuan) bele husik hela ba jerasaun foun ba aban bainrua tanba Timor Leste realiza tiha eleisaun depois halo golpe hodi la respeita rezultadu eleisaun.
Entretantu tuir Padre. Júlio Crispim Ximenes Belo, Clero Diocesano Diocese Baucau; nia esplika iha http://diocesededili.org/2017/11/13/entre-rejeicao-ou-hetan-voto-confianca-ba-pragrama-governo-iha-quantidade-ou-qualidade-tuir-crdtl/ katak, Sétimu governu konstitusionál nia programa Parlamentu nasionál rejeita ona ba dahuluk tanba ne’e funsionamentu sei enfrenta nafatin hela dezafiu no obstákulu oi-oin.
Dezafiu sira, entre seluk, mak VII governu forma husi partidu mais votado nia aliansa ne’ebé hetan apoiu husi deputadu Nain 30, menus liu husi deputadu bloku opozisaun Maioria Parlamentár (bloku OMP) ho Nain 35 iha PN.
Obstákulu sira, entre seluk, mak programa Governu hetan ona mosaun “rejeição” dala ida iha PN husi OMP sira, ne’ebé sei iha mós posibilidade boot atu hetan tan rejeição ba dala rua.
Rejeição ka hetan votu konfiansa ba programa Governu no nia konsekuénsia sira mak, Karik programa Governu nee hetan votu konfiansa ida husi PN, tuir mai Governu bele executa nia programa sira nee. Maibé, karik programa Governu hetan rejeisaun dala ida husi PN, tuir mai Governu tem que elabora didi’ak fali hodi submete dala ida tan ba apreciação PN nian. Mak programa Governo hetan rejeisaun dala rua tutuir malu, implika demissão Governo (art. 112.º, n.º 1 (d) CRDTL). Demissão Governu nee, PR rasik mak usa nia kompeténsia exclusiva hodi halo demisaun ba Governu no halo exoneração ba Primeiru Ministru (art. 86.º (g) CRDTL).
(Jornalista : Agapito dos Santos)
(Editór : Manuel Pinto)
