DILI (TATOLI)—Vise Ministru Dezenvolvimentu Habitasaun, Ordenamentu no Ambiente (DHOA), Abrão Gabriel Oliveira Santos konsulta programa ministériu ba komunidade iha Timor laran tomak ho objetivu atu komunidade bele komprende ministériu relevante (DHOA) nia programa serbisu.
“Komunidade entusiaz ho ami nia programa tanba liga direta ba komunidade vulnerável sira nia moris,” Abrão hato’o informasaun ne’e ba Ajénsia Tatoli via telefónika iha nia serbisu fatin, Caicoli, Dili, sesta ne’e.
Nia haktuir katak konsultasaun programa ne’e hala’o tiha ona iha Munisípiu Manufahi, Ainaro no semana oin sei kontinua ba munisípiu sira seluk.
Programa habitasaun ne’e, nia esplika, ho intensaun atu halo uma ba komunidade vulnerável sira (kbiit laek) iha kada munisípiu tuir estudu ne’ebé iha.
Governante ne’e hatutan uma MDG’S ne’ebé Governu anteriór harii ona ba komunidade kbiit laek sira iha Timor laran ne’e la’ós ladi’ak maibé implementasaun polítika maka ladún ladi’ak tanba modelu uma ne’e hanesan cobe house no nesesidade sira seluk.
“Polítikamente ne’e loos ona maibé implementasaun polítika ne’e maka la loos. Signifika katak uma ne’ebé harii ne’e nia modelu hanesan cobe house no ida ne’e la dura ba tempu naruk. Aleinde ne’e, falta fornesementu bee-moos,” nia esplika.
Iha programa habitasaun ne’e, eis emprezáriu ne’e esklarese, la’ós harii de’it uma ba vulnerável sira maibé harii mós uma ba funsionáriu sira ho tipu kréditu. Uma hirak ne’e, nia tenik, modelu simplis maibé parede tomak (full tembok) ne’ebé kompletu ho kuzina, hariis fatin no kareta nia para fatin.
Kona-ba programa ordenamentu, Abrão hatán, sei harii espasu di’ak iha kapitál kada munisípiu nune’e bele fasilita habitante sira atu evita disputa ba hela fatin no harii dezenvolvimentu tuir regra. Bainhira harii dezenvolvimentu iha kapitál la tuir regra, tuir nia, sei fó implikasaun ba movimentu transporte, ema no sei hamenus polusaun natureza (anin).
Aleinde ne’e, Abão hatutan, sei harii ambiente ida di’ak liu-liu trasa polítika hodi bandu komunidade labele soe foer arbiru nune’e evita inundasaun no hadook komuidade hosi moras oi-oin. Nune’e mós, kria polítika atu proteje ai-horis sira hodi prevene erosaun.
(Jornalista: Xisto Freitas)
(Editór : Manuel Pinto)
