LIKISÁ (TATOLI)-Sétimu Governu konstitusionál ne’ebé lidera husi Primeiru Ministru, Mari Alkatiri, Kuarta (6/12) ohin selebra natal no tinan foun hamutuk ho korpu diplomátiku sira iha otél Lauhata Beach Likisá.
Primeiru Ministru iha nia entrevista ho hatete, natal no tinan foun hamutuk ne’e hatudu sinál mantein relasaun kooperasaun governu ho korpu diplomátiku sira iha tinan oin mai (tinan 2018).
“Se de’it maka ukun rai ida nee presiza hametin relasaun ho ita ninia korpu diplomátiku sira ne’ebé oras ne’e iha ita nia rai,” Primeiru Ministru Dr. Mari Alkatiri afirma, iha Lauhata, Likisá, ohin.
Natal no tinan foun hamutuk, Alkatiri espera sei resolve ona tensaun polítika ne’ebé mak akontese iha rai Timor.
“Tinan 2018 hanesan tinan tranzisaun tanba governu ida ne’e tenke selu tusan husi governu ida uluk para ita bele halo planu ba dezenvolvimentu,” atuál sekretáriu jerál Fretilín ne’e konsidera.
(Jornalista : Agapito dos Santos)
(Editór : Manuel Pinto)
