DILI (TATOLI)—Komunidade Akadémiku hosi Universidade Nasionál Timor Lorosa´e (UNTL) hato´o sira nia rekomendasaun ba Prezidente Repúblika (PR), Francisco Guterres Lú Olo, atu responde ba situasaun polítika iha rai laran.
Rekomendasaun ne´e sira (komunidade akadémiku) hato´o bainhira soru-mutu ho Prezidente Repúblika iha Palásiu Prezidente Nicolau Lobato, Bairru Pité, Dili, kuarta lorokraik ne´e, hafoin atende Prezidente Repúblika nia konvite ne´ebé husu sira atu fó sira nia hanoin ba Prezidente Repúblika kona-ba situasaun polítika iha nasaun ne´e.
Reitór UNTL, Francisco Miguel Martins, maka lidera komunidade refere no hato´o sira nia opiniaun ka rekomendasaun hanesan tuir mai ne´e, ne´ebé la haliis ba grupu ka partidu ruma.
Komunidade Akadémiku fó votus konfiansa tomak ba Prezidente Repúblika nu´udar Komandante Supremu FALINTIL-Forsa Defeza Timor-Leste (F-FDTL) atu uza nia kompeténsia prerogativu ho hanoin krítiku no prudente hodi kaer ba Konstituisaun RDTL ho rigór no kaer Konstituisaun nu´udar baze fundamentál hodi fó solusaun ba problema hotu ne´ebé akontese iha nasaun ne´e, hodi garante unidade no estabilidade nasionál.
Rekomenda atu Prezidente Repúblika rona líder nasionál sira hotu, liu-liu líder istóriku sira ne´ebé ho hanoin di´ak atu konstrui nasaun ida ne´e iha páz, harmonia no demokrasia hodi hametin unidade no estabilidade nasionál.
Husu mós atu kria diálogu prezidensiál ho líder istóriku ho espíritu demokrátiku, nasionalizmu, unidade no onestidade hodi solusiona problema iha rai laran no provene infiltrasaun interna ba interese rai liur nian ba Devide Et Impera.
Husu atu muda diverjénsia ideia, hodi hetan solusaun ida ne´ebé ekilibriu no justu tuir Konstituisaun haruka.
Husu Xefe Estadu atu kontinua kaer metin nia deklarasaun iha sorumutu ho komunidade Suai iha ámbitu komemorasaun Proklamarasaun Independénsia 28 Novembru liu-ba katak sei hola desizaun ida ne´ebé sei la hasusar povu—desizaun ida ne´ebé kontinua garante páz, estabilidade nomós minimiza konsekuénsia momentum ba ekonomia, seguransa, edukasaun, páz no estabilidade.
Husu atu garante no kaer metin relasaun di´ak entre instituisaun F-FDTL no PNTL atu bele sai forsa ida ne´ebé imparsiál ba povu no ba TL hodi hametin lutu ameasa interna no externa.
“Ne´e kria kondisaun tranzitóriu ne´ebé di´ak atu tránzita estafeta lideransa demokrátiku ne´ebé nakonu ho espíritu nasionalizmu, patriotizmu hosi jerasaun tuan ba jerasaun foun hodi kaer metin prinsípiu aswa´in sira nian,” dehan komunidade akadémiku.
Iha biban ne´e, Prezidente Repúblika hateten ideia hirak ne´e hakbiit Xefe Estadu atu hola desizaun ruma karik atu konsidera saida maka akadémiku hirak ne´e hateten.
Lú Olo informa katak entre pontu sira ne´ebé mensiona, iha pontu rua maka fundamentál liu atu prezidente aplika maka hala´o diálogu ho líder istóriku sira no hola desizaun tuir Konstituisaun atu labele afeta ba povu nia moris. (Jornalista: Xisto Freitas)
