DILI (TATOLI)-Prokuradór Jerál Repúblika, José Ximenes inklui autoridade prevensaun no kombate KKN (Korrupsaun, koluzaun no nepotizmu) lansa módulu treinamentu jornalizmu investigativu, prodúz husi CEPAD-Sentru Estudu ba Dame no Dezenvolvimentu, ne´ebé utiliza iha treinamentu ba jornalista sira, durante loron tolu, 19-21 Setembru 2017.
Módulu ho títulu Habiit Koñesimentu Mídia ba Prevene Korrupsaun iha Timor-Leste ne´e, lansa iha Salaun Delta Nova, Dili, Kuarta (06/11), iha ámbitu komemorasaun loron mundiál ba korrupsaun, sei monu iha Sábadu (09/12), organiza husi CEPAD, Husi Ita Ba Ita.
Hafoin lansamentu, módulu ne´e entrega diretamente ba reprezentante jornalista, husi mídia imprime no eletrónika, la inklui Ajénsia Notísias Timor-Leste-TATOLI no online, www. Tafara.tl.
Módulu treinamentu jornalizmu investigativu ne´e kompostu husi pájina 34 ho konteúdu hanesan; definisaun korrupsaun, impaktu korrupsaun, instituisaun xave ba kombate korrupsaun, papél mídia iha jornalizmu investigativu.
Nune´e mós, téknika kobertura investigativu ba korrupsaun, kódigu étika jornalista, informasaun saida mak públiku bele asesu no labele asesu, ezemplu kobertura investigativu ba korrupsaun nó mós prátika hakerek lead news ba features.
Autór pakote treinamentu ba jornalizmu investigativu ne´e mak konsultór independente, komunikasaun negósiu-étika, Gerardus Nuba Biban no konsultór independente no jornalista senior, Otelio Ote.
Kontribuisaun mós husi ekipa CEPAD, koordenadora programa KKN, Ivonia Pinto Tsia, peskizadora programa KKN, Adelaide Lopes Sarmento no asistente peskizadór, Abílio Tilman.
Entretantu, elaborasaun módulu treinamentu ne´e ho objetivu atu apoia jornalista sira nu´udar meius ida atu habiit koñesimentu públiku liuhusi reportajen ba kazu korrupsaun ne´ebé loloos no kredivel ba públiku atu bele asesu liuhusi mídia espesífiku jornál sira.
Enkuantu, prosesu dezenvolve módulu treinamentu ne´e, hahú iha Fevereiru 2017, CEPAD liuhusi ekipa audio-vizuál hetan malu ho ema xave sira iha instituisaun mídia hodi diskute kona-ba nesesidade ba abilidade (skill) no treinamentu ba jornalista sira hodi hala´o kobertura kona-ba asuntu korrupsaun.
Prosesu ba hamosu módulu treinamentu ne´e, liuhusi mós faze peskiza dokumentu, teste ba instituisaun relevante sira hodi integra mós ho konsultór sira-nia hanoin molok hato´o treinamentu inklui konkorda ba prosesu treinamentu no finalizasaun ba módulu ne´e hafoin treinamentu.
(Jornalista: Rafy Belo)
(Editór : Manuel Pinto)
