DILI (TATOLI)—Prezidente Tribunál Rekursu, hala’o hela tramitasaun (prosesu) ba prosesu sivíl kona-ba providénsia kautelár ne’ebé Prezidente Parlamentu Nasionál (PPN), Aniceto Longuinhos Guterres Lopez aprezenta ba Tribunál Rekursu, segunda (11/12).
Prezidente Tribunál Rekursu Deolindo dos Santos informa katak Tribunál Rekursu (TR) sei la adianta uluk kona-ba prosesu ne’e los ou la’e tanba lei bandu ida ne’e.
“Ha’u seidauk bele pronúnsia katak rekursu ne’e loos ka la loos tanba lei la permite atu hateten sai ida ne’e ba iha públiku. Só iha desizaun finál maka TR foin bele hateten sai loos ka la loos,” nia dehan ba jornalista sira iha Palásiu Prezidente Nicolau Lobato, Bairru Pité, Dili, Tersa (12/12).
Prosesu Sivíl ne’ebé Aniceto aprezenta ba Tribunál Rekursu (TR) relasiona ho partidu tolu hanesan CNRT, PLP no KHUNTO halo Mosaun Destituisaun ba ninia kargu tanba deskonfia viola Konstituisaun no Rejimentu Parlamentu Nasionál.
Nune’e Deolindo konsidera prosesu refere liga ba kestaun inkonstitusionalidade, entaun tenke aprezenta ba iha Tribunál Rekursu hodi deklara ninia konstitusionalidade no inkonstitusionalidade.
“Ha’u nu’udar prezidente Tribunál Rekursu no juiz ida, labele termina nia tramitasaun ka prosesu ne’e tuir ha’u nia hakarak. Ami só bele kumpri de’it regra tramitasaun sira ne’ebé akontese ona,” Deolindo hatutan.
Nia esklarese TR la haree ba kestaun polítika ne’ebé akontese iha Parlamentu Nasionál no akontese iha Governu, maibé Tribunál Rekursu só haree ba Konstituisaun ho lei. Tanba ne’e, nia tenik, Tribunál foti desizaun ne’e bazeia de’it ba Konstituisaun ho lei.
Nia haklaken Parlamentu no Governu ne’e konstituidu hosi partidu polítiku sira, maibé TR lae. Tanba laiha partidu polítiku iha TR, nia afirma, entaun TR haree de’it ba saida maka Konstituisaun no Lei hateten.
(Jornalista: Xisto Freitas)
(Editór : Manuel Pinto)
