DILI, (TATOLI) – Primeiru-Ministru (PM), Marí Alkatiri, asina ona karta naun-objesaun ba Programa Mikro-Finanseiru ho Uniaun Europeia (UE) liuhosi Embaixadór UE, Alexandre Leitão, ba investimentu ho montante millaun EUR 2 husi Banku Investimentu Europeia (EIB – European Investment Bank) ne’ebé sei ezekuta husi Kaebauk Investimentu no Finansa (KIF) hodi tulun negósiu kiik.
Embaixadór UE, Alexandre Leitão, hatete EIB servisu hamutuk Timor-Leste iha programa barak maibé presiza realiza lai pasu Mikro-Finanseiru tabna, abertura programa ne’e sei serbí benefisiáriu 58.000, pursentu 80 hosi klinte KIF, pursentu 91 husi feto no pursentu 70 reprezenta komunidade iha área rurál, ema sira ne’e sei hahú negósiu kiik no la presiza osan barak.
“Presiza Mikro-Finanseiru atu UE no KIF komesa ho prinsípiu tenke halo estudu viabilidade hodi apoiu projetu boot seluk ne’ebé suporta Estadu Timor-Leste iha área agrikultura no seluk tan hodi komersiante kiik husi rekursu ne’ebé limitadu bele komesa negósiu kiik”, dehan ba jornalista sira hafoin hasoru malu ho Xafe Governu, iha Palásiu Governu, ohin.
Alexandre mós hatutan EU disponível atu kontinua fó apoiu, enkuantu programa kooperasaun ne’ebé atu diversifika no kresimentu ekonomia atu la-depende de’it husi fundu petrolíferu no kualker tempu polítiku ne’ebé kompleksu hanesan agora dadauk, Estadu hatudu ba komunidade internasionál hodi rezolve ninian problema rasik ho forma pasífika.
“Kualker situasaun ne’ebé autoridade timoroan sira hili, ami sei kontinua servisu hamutuk ho Timor-Leste”, afirma.
Entretantu, Servisu Kooperativu KIF, Elizeu Oliveira Gomes, hateten ninia parte servisu hamutuk ona ho EU desde tinan rua liuba no seidauk konsege hetan akordu ruma maibé ohin konsege.
Kooperasaun EIB hotu iha Timor-Leste, presiza iha naun-objesaun husi governu. Prosedimentu ne’e hanesan akordu Cotonou (akordu entre UE ho nasaun Afrikadu no Pasífiku sira). EIB halo investimentu iha área edukasaun, agrikultura no abitasaun.
KIF ne’ebé agora dadauk iha ona kliente hamutuk 13.000 ho funsionáriu 300, uluk hanesan Organizasaun Noun Govermenal (ONG) ho naran Tuba Rai Metin maibé regulamentu foun husi Banku Sentral Timor-Leste (BSTL), transformasaun husi Tuba Rai Metin ba fali kompañia foun ho naran Kaebauk Investimentu no Finansas, SA.
Jornalista: Julia Chatarina
Editora: Rita Almeida
