DILI, (TATOLI) – Komisáriu Komisaun Anti Korrupsaun (KAK), Adérito António Pinto Tilman, hatete funsionáriu públiku barak mak seidauk hatene kona-ba konsikuénsia legál husi prosesu aprovizionamentu ne’ebé sira halo.
Nune’e KAK iha tinan ne’e tuir nia planu estratéjia 2018 nian halo sensibiliza ba setór públiku liuliu funsionáriu públiku sira atu hatene oinsá prevene no kombate korrupsaun iha ministériu laran.
“Dalabarak prosesu sira ne’e la emerjénsia mas tau emerjénsia. Dalabarak kompañia sira ne’ebé envolve iha projetu sira ne’e, ema iha ligasaun partidu, ligasaun familiár, tanba ne’e mak enkontru ho sira atu fahe informasaun ho sira para hatene atu labele monu iha buat ida konflitu interese, labele komete krime ida naran partisipasaun ekonómika iha negósiu”, katak Komisáriu hafoin divulga informasaun sobre aspetu prevensaun korrupsaun ba kargu xefia sira iha Sekretariu Estadu Juventude no Traballu (SEJT) iha Kaikoli, ohin.
Adérito hatutan tanba kazu barak ne’ebé KAK investiga maoria hanesan ne’e ho ida ne’e fó hanoin ba funsionáriu sira atubele hatene sala ne’ebé mak sira halo ona karik labele halo tan iha futuru.
Sobre kazu abuzu podér no nepotizu ne’ebé deskonfia akontese iha SEJT, Komisáriu KAK hatete seidauk hetan informasaun eskrita, maibé akompaña iha mídia no espera katak bele halo agregasaun ba ida ne’e.
SEJT, Nívio Leite Magalhães, hatete informasasun husi KAK ne’e oinsá atu hasa’e koñesimentu funsionáriu sira liuliu kona-ba provensaun korrupsaun no atu korrupsaun, tanba hahalok sira ne’e ladi’ak ba povu no nasaun.
“Oinsá bele hala’o serbisu ho loos no moos, oinsá mak funsionáriu sira hotu bele kontribui ba boa governasaun, hasa’e kualidade serbisu públiku nian depois ho profisonalizmu, hakribit korrupsaun”.
Tanba korrupsaun ne’e di’ak ba ema ida halo ne’e, maibé ladi’ak ba povu no nasaun tanba ne’e funsionáriu sira iha serbisu fatin teke tane aas interese povu no nasaun.
Jornalista: Maria Auxiliadora
Editora: Rita Almeida
