DILI (TATOLI)—Prezidente Partidu Kmanek Haburas Unidade Timor Oan (KHUNTO), Armanda Berta dos Santos hateten KHUNTO nia program ba kampaña eleisaun antesipada la sees hosi programa ne’ebé FRETILIN, PD no partidu sira seluk iha.
“Programa sira ne’e hanesan kontinuasaun de’it hodi partidu sira seluk ne’ebé antes ne’e ukun ona, tanba ne’e oinsá bele implementa hodi hadi’a povu nia moris,” Berta hato’o asuntu ne’e ba jornalista sira iha Palásiu Prezidente Nicolau Lobato, Bairru Pité, Dili, kuarta ne’e.
Iha kampaña eleisaun jerál 2017 liu-ba, Partidu Kmanek Haburas Unidade Nasionál Timor Oan (KHUNTO) ho númeru sorteiu 3 iha sufrájiu (eleisaun) parlamentár 2017 iha nia alvu prinsipál bainhira manán mak sei fó prioridade liu ba setór agrikultura, edukasaun, saúde no kombate korrupsaun no hadi’a dalan ba moris di’ak.
Prezidente Partidu KHUNTO, Armanda Berta dos Santos iha altura ne’ebá hatete partidu iha preparasaun kuandu povu fó fiar mak sei implementa programa sira liu-liu maka kombate korrupsaun.
“Sé maka atu tuur iha kargu Primeiru-Ministru, hahú husi xefe suku to’o ema sira ne’ebé kaer pasta Governu karik sei lori bá halo juramentu iha Ramelau tutun atu nune’e bele halakon korrupsaun iha rai doben ida ne’e,” hatete Armanda liuhusi komísiu iha Tasi-Tolu.
(Jornalista: Xisto Freitas)
(Editór : Manuel Pinto)
Bele klik link iha kraik hodi lee..
http://www.tatoli.tl/2017/07/khunto-prioritiza-programa-lima/
