DILI, (TATOLI) – Ministru Administrasaun Estatál, Valentim Ximenes, husu ba autoridade lokál hanesan Polísia Nasionál Timor-Leste (PNTL) no autoridade munisípiu iha teritóriu tomak atu fó apóiu ba Sekretariadu Tékniku Administrasaun Eleitorál (STAE) ho orsamentu ne’ebé sufisiente para eleisaun la’o ho susesu.
“Ha’u husu apoiu komandante polísia munisípiu, autoridade munisipál inklui rejiaun espesiál atu apoiu STAE ho orsamentu sufisiente para halo eleisaun ho susesu”, hatete nia bainhira halo intervensaun iha sorumutuk preparativu ba eleisaun antesipada ho autoridade munisipál, delegadu STAE munisípiu, komandante PNTL munisipál no parseiru ne’ebé suporta aktu eleitorál iha salaun Delta Nova, ohin.
Faze dahuluk ne’ebé STAE sei infrenta mak resensiamentu, mesmu la’ós buat foun maibé sei halo eleisaun iha tempu badak ne’ebé tinan ida halo eleisaun iha fulan neen nia laran hanesan servisu boot ba STAE atu halo atividade sira ho susesu no pasífiku.
“Maibé ho kompromisu, ha’u fiar STAE ho ninia kapasidade no esperiénsia ho apoiu tomak hotu-hotu nia, ita iha diresaun jerál bele halo servisu ho di’ak ba ita nia Nasaun”, afirma.
Nune’e governante ne’e apela ba administradór postu sira tenke apoia kondisionál no inkondisionál ba STAE nia tékniku sira iha postu administrativu, nune’e ema labele halo reklamasaun bebeik.
“Resensiamentu obrigatóriu iha ordem kontituisaun nian, tanba ne’e kuandu loke ona tenke servisu ho laran para bele presta servisu di’ak”, katak
Nia dehan esperensia ne’ebé iha, tenke organiza jestaun, liu-liu buka osan atu finansia eleisaun ne’e rasik tanba eleisaunn antesipada agora dadauk ne’e la’ós eleisaun normál ho periúdu markadu maibé razoavel iha nasaun estadu demokrátiku no eleisaun ne’e mós monu iha momentu Estadu la’o hela ho rejime duo désimu.
“Hanesan ita hatene rejime duo desimu la permite ita atu halo planu asaun anuál ho ninia detallu. Governu ninia difikuldade boot mak uza osan liuhosi rejime duo désimu ho efisiente”, tenik.
Biar Governu iha difikulde boot uza rejime duo désimu atu investe osan maibé ho ezersísiu boot ne’ebé ministériu kompetente halo ho apóiu Estadu tomak, konsege iha osan sufisiente, inklui órgaun eleitorál STAE tanba governu garante osan atu halo eleisaun husi inísiu to’o remata.
Jornalista: Julia Chatarina
Editora: Rita Almeida
