Prezidente Repúblika Orgullu ho Kampaña Ne’ebé La’o Hakmatek

DILI (TATOLI)—Prezidente Repúblika, Francisco Guterres Lú Olo, sente orgullu ho kampaña polítika ne’ebé hahú ona iha semana ida resin maibé la’o ho hakmatek no trankuilidade.
“Tempu ba kampaña nu’udar tempu oportunidade ida ne’ebé ita hotu hamutuk atu aprezenta ita-nia ideia, aprezenta ita-nia liña asaun no ita-nia programa polítika hanesan bee-moos, saneamentu, edukasaun, eskola ho kualidade, saúde, ospitais, klínika, estrada no agrikultura,” Xefe Estadu hato’o ninia mensajen ne’e iha Palásiu Prezidente Nicolau Lobato, Dili, segunda ne’e, ne’ebé Ajénsia Tatoli asesu liuhusi Mídia Palásiu Prezidénsia Repúblika.
Lú Olo hateten sidadaun sira hakarak rona ideias, sira lakohi rona insultus ne’ebé dirijente polítiku sira halo ba malu, ne’e duni nia husu ba líder partidu polítiku sira atu labele uza kampaña hodi insulta malu, halo desturbasaun ba istória no halo kle’uk istória pasadu.
“Sé mak uza insulta, ita hatún ita-nia án de’it. Ita la ajuda ita-nia povu. Ita-nia joven sira hakarak simu edukasaun hosi demokrasia no debate. Sira lakohi simu edukasaun hosi demagojia ka insultus,” nia tenik.
Lú Olo hatutan veteranu sira mak tenke sai fontes inspirasaun ba ema hotu no sai ezemplu ba joven sira hodi tau ás dignidade pasadu nian.
“Ita-nia pasadu labele haluha. Ita respeita ita-nia pasadu. Ita fiar ba ita-nia istória. Bainhira halo nune’e, ita harii dadauk baze ba futuru ne’ebé ita só harii ho laran-moos, la’ós ho ko’alia bosok,” nia haklaken.
Jornalista: Xisto Freitas
Editór : Manuel Pinto

