Uza Atributu Artes Marcia’s, “Ha’u Lakohi Fó Konkluzaun Uluk”

DILI (TATOLI)–Prokuradór Jerál Repúblika (PJR), José da Costa Ximenes hateten nia lakohi julga uluk lider balun uza atributu Artes Marcia’s ne’e hanesan krime ida ka lae, no uza atributu Artes marcia’s hodi halo ezersísiu ne’e krime ida ka lae.
“Ha’u lakohi fó konkluzaun uluk. Prosesu investigasaun ne’ebé oras ne’e la’o iha Ministériu Públiku maka sei deside,” Ximenes hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, segunda ne’e, hafoin relata serbisu Ministériu Públiku ba Prezidente Repúblika, Francisco Guterres Lú Olo.
Nia lamenta ho órgaun Estadu balun ne’ebé halo de’it rekomendasaun devia la halo deklarasaun hanesan surpreza, maibé sira halo.
“Ha’u lakohi fó deklarasaun hanesan ema balun halo deklarasaun katak ema ida ne’e komete violasaun, ne’ebé la favorese ba estabilidade. Importante ita ajuda prosesu ne’e la’o,” PJR lamenta.
“Sé iha violasaun ida ne’ebé ita nia kompeténsia, ita assume. La’ós ita nia kompeténsia, ita rekomenda,” José Ximenes hatutan.
Tuir Lei Nú. 5/2013 bandu hala’o atividade Artes marcia’s hanesan PSHT, Kera Sakti, KORK no arte rituál sira no mós bandu uza atributu Artes marcia’s no arte rituál iha fatin ne’ebé de’it iha Timor.
Enkuantu iha abertura kampaíña, eleisaun antisipada, lider másimu, koligasaun partidu ne’ebé hanaran an, Aliansa Mudansa ba Progresu, uza atributu Artes marcia’s iha munisípiu Ainaru. Ho ida ne’e hetan lamentasaun hosi públiku, liu-liu rival polítiku sira maibé Prokuradór Jerál Repúblika, José da Costa Ximenes, rejeita fó konkluzaun uluk ba kazu ne’e krime ou lae. Tuir PGR husik ba prosesu investigasaun mak sei deside.
Jornalista: Xisto Freitas
Editór : Manuel Pinto

